Оросын арми байлдааны талбарт хүнд хохирол амссаар байгаа хэдий ч Кремль цэргийн хүчээ дахин нэмэгдүүлэхээр төлөвлөж байна. ОХУ-ын Ерөнхийлөгч Владимир Путин цэргийн албан хаагчдын тоог 15,500-аар нэмэгдүүлэх тухай зарлигт гарын үсэг зурснаар идэвхтэй алба хааж буй цэргийн албан хаагчдын нийт тоо 1.55 саяд хүрэхээр байна.

Ингэснээр тус улсын цэргийн хүчний нийт бүрэлдэхүүн 2,441,630  болж байна. ОХУ 700 дугаартай уг зарлигийг хууль эрх зүйн мэдээллийн албан ёсны цахим хуудсандаа нийтэлжээ. Оросын төрийн мэдлийн ТАСС агентлагийн мэдээлснээр, энэ нь тус улсын хувьд он гарсаар гаргаж буй ийм төрлийн дөрөв дэх зарлиг бөгөөд уг шийдвэрээр Засгийн газарт цэргийн хүчийг нэмэгдүүлэхэд шаардлагатай холбооны төсвийн хөрөнгийг Батлан ​​хамгаалах яаманд шилжүүлэн олгох үүрэг өгсөн байна.

Зарлигт цэргийн тоог нэмэгдүүлж буй шалтгааныг тайлбарлаагүй боловч Путин 2022 оны хоёрдугаар сард Украинд бүрэн хэмжээний түрэмгийлэл эхлүүлснээсээ хойш цэргийн албан хаагчдын тоог хэд хэдэн удаа нэмэгдүүлээд байна. Киев өнгөрсөн долоо хоногт парламентын сонгууль явуулсны дараа Оросын цэргүүдийг шинээр олноор дайчлахаар бэлтгэж байна гэж буруутгаж байгаа бөгөөд Украины Ерөнхийлөгч Владимир Зеленский Орос "янз бүрийн аргаар" цэргүүдийг элсүүлэх үйл явцыг  эхлүүлсэн гэж мэдэгдсэн боловч дэлгэрэнгүй мэдээлэл өгөөгүй байна. Гуравдугаар сард гарсан зарлигаар цэргийн албан хаагчдын тоог нийт 2,391,770 байхаар тогтоосон бол зургаадугаар сарын зарлигаар уг тоог 2,399,130 ​​болгон нэмэгдүүлжээ.

Наймдугаар сарын 1-нээс хэрэгжиж эхэлсэн зарлигаар цэргийн албан хаагчдын тоог 2,426,130 (үүнд 1,535,000 цэрэг багтана) болгож өөрчилсөн байна. "ТАСС" агентлагийн мэдээлснээр, Оросын цэргийн албан хаагчдын зөвшөөрөгдсөн нийт тоо гуравдугаар сараас хойш 49,860-аар нэмэгджээ.

Эх сурвалж. https://www.yahoo.com/news/world/articles/desperate-putin-signs-major-order-135443536.html