Японд нийт хүн амын тоо буурсаар байгаа хэдий ч тус улсын Эрүүл мэндийн яамны мэдээлснээр 100 ба түүнээс дээш насныхны тоо 100,000-ыг давжээ. Тус яамны мягмар гарагт танилцуулсан мэдээллээр, тус улсад 107,677 хүн 100 ба түүнээс дээш настай байгаа нь өнгөрсөн жилийнхээс бараг 8,000-аар өссөн байна. Ингэснээр тус улс хамгийн олон 100 ба түүнээс дээш настай иргэнтэй улс болоод байна. Тус яам энэ талаарх бүртгэлээ 56 жилийн өмнө эхлүүлснээс хойш уг тоо жил бүр нэмэгдсээр иржээ.

Эдгээр өндөр настнуудын 88 хувь буюу 94,298 нь эмэгтэйчүүд байна. Киото хотын оршин суугч, 114 настай Фуёо Кишимото нь тус улсын хамгийн өндөр настай эмэгтэй, харин Кумамото мужийн оршин суугч, 112 настай Хикару Като нь хамгийн өндөр настай эрэгтэй хүн аж. Дэлхийн банкны мэдээллээр, Япон улс дундаж наслалтаараа дэлхийд тэргүүлэгч орнуудын тоонд тогтмол багтсаар ирсэн бөгөөд 2024 оны байдлаар тус улсын дундаж наслалт 84-т хүрсэн нь АНУ-ын 79-тэй харьцуулахад өндөр үзүүлэлт юм. Тус улс 1963 онд 100 ба түүнээс дээш насныхны тооллогыг анх эхлүүлэх үед 153 хүн бүртгэгдэж байв. Энэ тоо 1981 онд 1,000-аас, 1998 онд 10,000-аас давж байжээ.

Японы нийт хүн ам буурсаар байгаа хэдий ч зуу болон түүнээс дээш настай хүмүүсийн тоо нэмэгдсээр байна. Хүн ам, нийгмийн аюулгүй байдлын судалгааны үндэсний хүрээлэнгийн мэдээлснээр, одоогоор 123 сая орчим байгаа ч тус улсын хүн ам 2070 он гэхэд
87 сая болж буурах төлөвтэй байна.

Өнгөрсөн онд төрөлтийн түвшин түүхэн доод түвшин буюу 1.14-т хүрсэн нь хүн амын тоог тогтвортой хадгалахад шаардлагатай 2.1 гэсэн үзүүлэлтээс хамаагүй доогуур үзүүлэлт болж байна.

Одоогоор 65 ба түүнээс дээш насныхан хүн амын 30 орчим хувийг бүрдүүлж байгаа бөгөөд 2070 он гэхэд энэ тоо 40 хувьд дөхөх төлөвтэй байна. Японы 47 мужийн 45-д нь хүн амын тоо буурсан бөгөөд бууралтын хурд нэмэгдсээр байна. Ерөнхий сайд Санаэ Такаичи хүн амын тоо буурч буй энэ нөхцөл байдлыг "чимээгүй онцгой байдал" хэмээн тодорхойлжээ.