Хятад улсын нүүрсний импорт долоодугаар сард энэ оны дээд түвшинд хүртэл огцом өссөн хэдий ч цаашид үргэлжлэх магадлал багатай түр зуурын хүчин зүйлсээс үүдэлтэй гэж ажиглагчид үзэж байна. Өнгөрсөн долоо хоногт нийтлэгдсэн албан ёсны мэдээллээр, долоодугаар сард нүүрсний нийт импорт өмнөх оны мөн үетэй харьцуулахад 23 хувиар нэмэгдэж, 43.73 сая тонн болжээ.

Энэ нь зургаадугаар сарын 42.78 сая тонн үзүүлэлтээс өссөн дүн бөгөөд дөрөвдүгээр сард бүртгэгдсэн энэ оны хамгийн доод түвшин болох 33.1 сая тонноос бараг гуравны нэгээр илүү үзүүлэлт юм. Энэ нь Хятад улсын нүүрсний импортын хэрэгцээ наймдугаар сараас эхлэн буурч магадгүйг харуулж байна. Хятад улс нүүрсийг үндсэн хоёр эх үүсвэрээс буюу далайн тээврээр болон хөрш орнуудаас (голчлон Монгол, мөн Оросоос тодорхой хэмжээгээр) хуурай замаар импортлодог.

Далайн тээврээр орж ирж буй нүүрс нь нийт импортын 75 орчим хувийг эзэлдэг ч сүүлийн жилүүдэд Монголоос, ялангуяа ган үйлдвэрлэлд ашиглагддаг коксжих нүүрсний нийлүүлэлт нэмэгдэх хандлагатай байна. “DBX Commodities”-ийн шинжээчдийн тооцооллоор, Хятад улсын наймдугаар сард далайн тээврээр импортолсон бүх төрлийн нүүрсний хэмжээ 31.23 сая тонн байгаа нь долоодугаар сарын 33.91 сая тоннтой харьцуулахад буурсан үзүүлэлт бөгөөд сүүлийн дөрвөн сарын хугацаанд анх удаа бууралт ажиглагдаж буй хэрэг аж.

Индонез улс нь дэлхийн хамгийн том нүүрс экспортлогч бөгөөд Хятад улсын гол нийлүүлэгч юм. Хятадын худалдан авагчдын дунд эрэлт ихтэй байдаг 4,200 ккал/кг илчлэгтэй нүүрсний үнийг "Argus" агентлаг энэ сарын 7-нд дууссан долоо хоногт тонн тутамд 62.51 ам.доллар гэж үнэлжээ. Албан ёсны мэдээллээр, Хятад улсын дулааны цахилгаан станцын үйлдвэрлэл 2026 оны эхний зургаан сард өмнөх оны мөн үеэс 2.9 хувиар өссөн байна.