Эх, хүүхдийн эрүүл мэндийн үндэсний төв Бүгд Найрамдах Солонгос Улсын Чосун их сургуулийн эмнэлэгтэй хамтран ажиллах хамтын ажиллагааны гэрээ байгууллаа.

Хамтын ажиллагааны гол зорилго нь хүүхдийн чих, хамар, хоолойн өвчний оношилгоо, эмчилгээ, мэс заслын тусламж үйлчилгээний чанарыг сайжруулж, орчин үеийн дэвшилтэт арга, технологийг эмнэлзүйн практикт нэвтрүүлэхэд чиглэж байна.

Өнөөдөр чих, хамар, хоолойн өвчний оношилгоо, эмчилгээ, тэр дундаа бичил болон дурангийн мэс засалд өндөр нарийвчлалтай технологи, шинэ арга техник өргөнөөр ашиглагдаж байна.

Тиймээс олон улсын туршлагыг судалж, үр дүнтэй арга технологийг эх орондоо нутагшуулахын зэрэгцээ эмч, мэргэжилтнүүдийн ур чадварыг тасралтгүй дээшлүүлэх хэрэгцээ, шаардлага бий.

Энэ хүрээнд Чосун их сургуулийн эмнэлгийн туршлага, дэвшилтэт технологи, мэс заслын арга, аргачлалаас суралцаж, ЭХЭМҮТ-ийн эмч, мэргэжилтнүүдийг тус эмнэлэгт мэргэшүүлэх сургалт, дадлагажуулалтад хамруулна. Мөн хоёр байгууллагын мэргэжилтнүүдийн алсын зайн зөвлөгөө, туршлага солилцоо, сургалт, эрдэм шинжилгээний хамтын ажиллагааг хөгжүүлнэ.

Ингэснээр хүүхдийн чих, хамар, хоолойн өвчний оношилгоо, эмчилгээний боломжийг өргөжүүлж, мэс заслын тусламж үйлчилгээний чанар, аюулгүй байдлыг сайжруулах, эмч, мэргэжилтнүүдийн мэргэжлийн ур чадварыг олон улсын түвшинд хөгжүүлэхэд чухал ач холбогдолтой юм.

Цаашид хамтын ажиллагааны хүрээнд дэвшилтэт арга, технологийг эмнэлзүйн практикт нутагшуулж, сургалт, судалгаа, мэргэжлийн зөвлөгөөг тогтмолжуулснаар хүүхдийн чих, хамар, хоолойн тусламж үйлчилгээний чанарыг сайжруулах, эмчилгээний шинэ арга технологийг нэвтрүүлэх боломж бүрдэж байна гэж ЭХЭМҮТ-өөс мэдээллээ.