Эрчим хүчний салбарын удирдах ажилтнууд бодлого, стратегиа хэлэлцлээ. 

Салбарын үйлдвэр, компаниудын удирдах түвшний 200 гаруй төлөөлөл оролцсон энэхүү уулзалтыг Эрчим хүчний сайд Б.Найдалаа нээж үг хэлэв.

Мөн тэрбээр “Эрчим хүчний салбарт баримтлах бодлого, стратеги” сэдвээр үндсэн илтгэл тавьсан юм.

Сайд Б.Найдалаа салбарын өнөөгийн нөхцөл байдлын дүгнэлтийг танилцуулж, тулгарч буй сорилтуудын талаар дурдаад, тэдгээрийг шийдвэрлэхийн тулд нэг бодлого, гурван зарчим баримтлан, есөн ажил хийхээр төлөвлөж, заримыг нь хэдийн эхлүүлснээ тэмдэглэв. Энэ хүрээнд Эрчим хүчний шилжилтийн стратегийн төлөвлөгөө, Устөрөгчийн стратегийн төслийг бэлэн болгоод буй. Өдгөө 66 орон Устөрөгчийн стратеги батлаад буй бөгөөд манай улс дараагийнх нь болохыг зорьж байна.

Түүнчлэн эрчим хүчний системийг ухаалаг болгох, тархмал эх үүсвэртэй болох, шинэ технологи, шийдлийг турших эрх зүйн орчин бүрдүүлж, хэрэглээнд нэвтрүүлэх, хөрөнгө оруулалтыг дэмжих, хувийн хэвшлийн оролцоо, үүргийг нэмэгдүүлэх, мэргэжилтнүүдийг сургах, дадлагажуулах, салбарын болон компаниудын засаглалыг сайжруулах зэрэгт анхаарч, эрчим хүчний ногоон шилжилтийг 2050 он хүртэл гурван үе шаттай хэрэгжүүлэхээр зорьж байна.

Эрчим хүчний сайд Б.Найдалаа “Монгол шиг эрс тэс уур амьсгалтай орон байхгүй. Хүнд өвлийг давдаг. Өвөрмөц онцлогтой учраас өөрийн хэрэглээнд таарсан шийдлийг эрэлхийлж, зоригтой туршиж үзэх хэрэгтэй.

Өдгөө эрчим хүч бус, өр үйлдвэрлэдэг салбар болчхоод байна. Цаашид хувийн хөрөнгө оруулалтыг дэмжинэ, хувийн хэвшлийн компанийн оролцоо улам нэмэгдэнэ.

Хиймэл оюунтай холбоотойгоор эрчим хүчний эрэлт төсөөлөөгүйгээр өсөж байна. Эрчим хүчний үйлдвэрлэлээ нэмэгдүүлэх шаардлага бий. Нүүрс, сэргээгдэх эх үүсвэрийн асар их нөөцтэй манай улс хямд, чанартай эрчим хүчийг бүс нутагт нийлүүлэх боломжтой гэж харж байгаа” хэмээн тэмдэглээд, эхлүүлсэн болон хэрэгжүүлэхээр зорьж буй ажлуудад салбарын компаниудыг санаачилгатай, идэвхтэй оролцохыг хүслээ.

Уулзалтын дараагийн илтгэлийг “Сэргээгдэх эрчим хүчний төслийн өрсөлдөөнт сонгон шалгаруулалт” сэдвээр Эрчим хүчний яамны Бодлого, төлөвлөлтийн газрын дарга Г.Энхтүвшин тавьсан юм. Сонгон шалгаруулалтад баримтлах гол зарчим нь ил тод байдал, тэгш мэдээлэл, өрсөлдөөн, ашиг сонирхлын зөрчилгүй явуулах гэдгийг тэрбээр тэмдэглэв. Тухайлбал, аукционы явцад оролцогчдын нэрийг нууцалж, тусгай дугаараар үнэ хаялцуулах зарчим баримтална.

Аукционд оролцогчдод хэд хэдэн үндсэн шаардлага тавих бөгөөд жилийн дундаж эргэлтийн хөрөнгө нийт хөрөнгө оруулалтын 10 хувиас доошгүй байх, сүүлийн таван жилд EPC, BOO, эсвэл IPP төслийн нэгээс дээш гэрээнд оролцсон байх зэрэг нь үүнд багтаж байна.

Үнэ бууруулах дуудлага худалдааны үндсэн механизмын тухайд ижил үнийн саналтай бол бүртгэлийн баримт бичгээ түрүүлж ирүүлсэн оролцогч давуу эрхтэй байх зэргийг тусгаад буй юм. Уг шалгаруулалтад 115 компани оролцохоор саналаа ирүүлээд байна.

Мөн Эрчим хүчний зохицуулах хорооны дарга Э.Түвшинчулуун “Эрчим хүчний салбарын үнэ тарифын бодлого, шинэчлэл” сэдвээр илтгэл тавив. Эрчим хүчний тарифын шинэчлэлийн дүнд 2025 онд борлуулалтын орлого нэмэгдсэнийг шинэ эх үүсвэр, ОХУ-ын импорт, нүүрсний уурхай, төмөр замын тээвэр, үйл ажиллагааны зардал, ББЭХС, АУЭХС-ийн татаасын бууралтыг нөхөх зэрэгт зарцуулах зохицуулалт хийсэн байна. Цаашид эрчим хүчний тарифын өөрчлөлт, орлогын дутагдлыг нөхөх арга хэмжээ авахаар төлөвлөж байгаагаа Э.Түвшинчулуун дарга дурдлаа.

Уулзалтын төгсгөлд санал, хэлэлцүүлэг өрнүүлэх үеэр оролцогчдын зүгээс саналуудаа хэлж, сонирхсон асуултууддаа Эрчим хүчний сайдаас хариулт авлаа гэж Монгол Улсын Эрчим Хүчний Яамнаас мэдээллээ.