Арсланзагас хэмээх нэгэн төрлийн хортой загас Газар дундын тэнгист улам олширч, өмнө нь амьдрахад тохиромжгүй гэж үзэж байсан хэсгүүдэд хүртэл тархсан нь экологид гүн нөлөө үзүүлэх эрсдэлтэй болоод байна. Эрдэмтдийн мэдээлснээр арсланзагас нь арван жилийн өмнө анх Газар дундын тэнгист үзэгдэж эхэлжээ. Нидерландын Вагенинген их сургуулийн явуулсан шинэ судалгаагаар арсланзагас уг төрлийн загас тэсвэрэлэх боломжгүй гэж үзэж байсан хүйтэн хэсэгт хүртэл тархсан нь аюулын харанга дэлдэж байна. Судалгааг ахлан явуулсан Давиде Боттачини “Олон жил явуулсан судалгааны дүнд арсланзагас нь шинэ орчинд түргэн хувьсаж, хүрээлэн буй орчиндоо дасан зохицож буй нь тун гайхмаар хэрэг юм” гэж онцолжээ. "Птеройс милес, птеройс волитанс" гэж шинжлэх ухаанд нэршсэн арсланзагас нь Энэтхэг-Номхон далайн уугуул оршин суугч бөгөөд Газар дундын тэнгис, Атлантын далай, Карибын тэнгис, Мексикийн буланд өвч тархаад байгаа юм байна.

Нидерландын судлаачдын судалгааны гол зорилго нь арсланзагас Газар дундын тэнгист ирж, нутагшсанаар бүс нутгийн экологид ямар нөлөө үзүүлэхийг тодорхойлох байв. Арсланзагас нь хүмүүсийн тэр бүр сайн мэддэггүй араатан бөгөөд насанд хүрсэн эмэгчин нь жилийн турш үржилд орж, хоёр сая өндөг гаргадаг. Гэвч арсланзагас нь махчин учраас тааралдсан бүхнийг иддэг. Үр дүнд нь тухайн бүс нутаг дахь загасны тоо толгой цөөрөх, сүргийн бүтэц өөрчлөгдөх, ховор төрлийн загас олноор хоргодох аюултай гэж эрдэмтэд санаа зовж буйгаа илэрхийлэв.