АНУ-ын Ерөнхийлөгч асан, тэрбумтан Дональд Трамп ирэх намар болох тус улсын Ерөнхийлөгчийн ээлжит сонгуульд дахин нэр дэвшихийн тулд өмнөх сонгуулийн үеэр нэр холбогдсон олон тооны хэрэгт буруугүй гэдгээ батлах ёстой. Үүний тулд тэр шүүхийн хаалга татаж, түүнд холбогдох хэргийн сонсгол үргэлжилж байгаа билээ. Гэтэл тэр удаа дараагийн үйлдлээр сонсголыг орхиж гарах, шүүгчийн яриаг тасалдуулах, мэдүүлэг өгөхөөс татгалзах зэргээр сонсголын дэгийг зөрчсөн учир тэвчээр алдсан шүүгч хариуцлага тооцохоор болсон байна. Эх сурвалжийн мэдээлж буйгаар Д.Трамп нь арав гаруй удаа сонсголын дэг зөрчжээ.

Нью-Йоркийн шүүх дээр ид яригдаж байгаа 130,000 долларын хахууль өгч бусдын амыг хамхисан гэх хэргийн сонсголыг удирдан явуулж буй тус шүүхийн шүүгч Д.Трампын дэггүй үйлдлийг үл тэвчин 10,000 долларын торгууль төлөх эсвэл 30 хоног баривчлагдах шийтгэл оноосон байна. Шүүхийн сонсголыг ажиглагчид экс Ерөнхийлөгчийн дэггүй үйлдлийг таслан зогсоохын тулд баривчлан саатуулах нь зөв гэдэг санал гаргасэн тухай Newsweek мэдээлэв.  

Дональд Трамп ийнхүү дэг зөрчсөний улмаас шийтгэл хүлээх болж байгаа нь анхны удаагийнх биш. Өмнө нь иргэний хэргийн шүүхийн шүүгч Артур Енгорон түүний тавтиргүй занг  дарахын тулд сонсголын дэгийг хоёр удаа зөрчсөн хэмээн 15,000 доллараар торгож байсан юм. Д.Трамп нийт 34 төрлийн гэмт хэрэгт холбогдсон бөгөөд бүгдэд нь буруугүй гэж мэдүүлсээр байгаа билээ.