БНХАУ-ын тэргүүлэх эрдэмтдийн хийсэн шинэ судалгаа, шинжилгээгээр тус улсын томоохон хотууд живж, хурдацтай хотжиж буй хэдэн зуун сая хүний амь, амьдрал ирэх хэдхэн арван жилийн дотор эрсдэлд орох аюултай байна хэмээн мэдэгджээ. Шинжлэх ухаанд хөрс суух гэдэг техникийн нөхцөл байдаг бөгөөд томоохон хотуудын өндөр, өндөр цамхагийг босгосон газар доош сууснаар далайн түвшнээс доош хотойж, цаг уурын өөрчлөлтийн нөлөөгөөр бий болж буй далай, тэнгисийн усны түвшин нэмэгдэх явцыг түргэсгэж, улмаар тухайн бүс нутаг усанд автахыг хэлдэг гэж тайлбарлаж болох юм. Хотын хөрс суух үзэгдлийн нөлөөгөөр эх газрын хотуудад байшин барилга, зам, талбай хагарч цуурахаас гадна цэвэр, бохир усны хоолой хагарч их хэмжээний ус алдах нь бий. “Сайнс” сэтгүүлд гарсан Хятадын судалгааны хүрээлэнгийн 50 эрдэмтний хийсэн шинэ судалгаанд дурдсанаар БНХАУ-ын хамгийн том 82 хотын тэн хагаст нь хөрс суух үзэгдэл эрчимжиж буйг тогтоожээ. Тэдгээр хотод Хятадын хот суурин газрын хүн амын гуравны нэг оршин суудаг учир олон арван сая хүний амьдрал эрсдэлтэй байдалд орсныг анхаарууллаа. Мөн тэдний тооцоолсноор ирэх зуун жилийн хугацаанд хөрс суух үзэгдлийн нөлөөгөөр Хятадын далайн эрэг орчмын суурьшлын бүсийн дөрөвний нэг нь усан доогуур орно. Эрдэмтэд 2015, 2022 онд хийсэн хөрс суух үзэгдлийн судалгаануудыг харьцуулан шинжилснээр дээрх дүгнэлтэд хүрчээ.