АНУ, Хятадын тал худалдааны маргааны галыг бага ч атугай намжаах хэлцэлд хүрсний дараа зэсийн ханш 1.8% унажээ. Өчигдөр үдийн арилжаагаар КОМЕКС бирж дээр нэг фунт зэсийн ханш 4.63 ам.долларт хүрсэн байна. Хэдийгээр алгуур буурч эхэлсэн ч тонн тутамдаа 10.2 мянган тоннд хэвээр байна.

Он гарснаас хойш хамгийн өсөлттэй байсан түүхий эдийн нэг бол зэс бөгөөд бараг 16 орчим хувиар өсөөд байна. Өнгөрсөн гуравдугаар сард тонн тутамдаа 11 мянган ам.доллароос давж түүхэн хэмжээнд хүрч өссөн. Цаашид АНУ-ын засаг захиргааны баримтлах бодлогоос шалтгаалан зэсийн ханш тонн тутамдаа 9-10 орчим мянгад хэлбэлзэнэ гэж шинжээчид таамаглажээ.

БНХАУ-ын  зэсийн баяжмалын импорт дөрөвдүгээр сард 3 сая тоннд хүрсэн байна. Энэ нь өнгөрсөн оныхтой харьцуулахад 24 хувиар өссөн үзүүлэлт юм. Түүнчлэн боловсруулах үйлдвэрийн салбарын өсөлт зэсийн ханшийг өндөр түвшинд барих гол шалтгаан болоод байна. Хэдийгээр Индонезийн эрх баригчдын бодлогоос шалтгаалан “Гленкор” уурхайн зэс хайлуулах үйлдвэрт саатал гарсан ч Хятад бусад уурхайгаас импортоо нэмэгдүүлсэн нь ч нөлөөлжээ.

Өнгөрсөн долоо хоногийн сүүлээр АНУ, Хятадын худалдааны төлөөлөгч нар Швейцарийн Женев хотноо уулзаж АНУ-ын зүгээс Хятадад тавьсан 145 хувь хүртэлх тарифыг 30 хувь хүртэл бууруулж, хариуд нь Хятадаас АНУ-д тавьсан 125 хувийн тарифыг 10 хувь болтол бууруулахаар тохиролцсон юм. Энэ нь технологийн томоохон компаниудад нөлөөлсөн. Учир нь тарифаас шалтгаалан технологийн салбарын нэгж бүтээгдэхүүний үнэ нэмэгдэх хүлээлттэй байсан ч тохироонд хүрсний дараа томоохон компаниуд үнэ нэмэх шийдвэрээ эргэн харж байна. Ялангуяа хагас дамжуулагч болон ухаалаг утасны үнэ огцом өсөхгүй байх нөхцөл бүрдсэн. Гэвч Трампын засаг захиргааны эргэж буцсан шийдвэр зэсээс хамааралтай салбарт ихээхэн сорилт үүсгээд байгаа билээ.