Монголбанкны аудитлагдсан тайланд дурдсанаар 2024 онд 306.2 тэрбум төгөргийн цэвэр ашигтай ажиллажээ. Үүнээс өмнө 2023 оны тайлангаар 115.4 тэрбум төгрөгийн алдагдал хүлээж байсан юм. Өнгөрсөн онд ашигтай ажилласан нь уул уурхайн бүтээгдэхүүний зах зээл дээрх ханш өссөн, үүнээс шалтгаалан гадаадын шууд хөрөнгө оруулалт нэмэгдсэн, улмаар үнэт металл худалдан авалт эрс сайжирсан нь голлон нөлөөлжээ. Тухайлбал алт болон үнэт металлын арилжааны ашиг 336.6 тэрбум төгрөгт хүрсэн нь 2023 оныхоос 3.5 дахин өссөн үзүүлэлт.

Гэвч хуримтлагдсан алдагдал өнгөрсөн оны эцсийн байдлаар 7.4 их наяд төгрөгт хүрээд байна. Үүнд нөлөөлсөн хүчин зүйлийн нэг нь гадаад валютын арилжаа. Тайланд дурдсанаар гадаад валютын арилжаанаас 48.2 тэрбум төгрөгийн алдагдал хүлээгээд байна. Түүнчлэн Захиргаа, үйл ажиллагааны бусад зардал нь 116.4 тэрбум төгрөгт хүрсэн. Өмнөх тайлантай харьцуулахад бараг 50 орчим хувиар өссөн гэсэн үг. Ялангуяа цалин болон мөнгөн дэвсгэрт хэвлүүлэх зардал өндөр дүнгээр өсжээ.