ОХУ-ын Ерөнхийлөгч Владимир Путин Нацистын Германыг дарсны 80 жилийн ойн баярыг тохиолдуулан зарласан эвлэрэл хэрэгжиж эхэлснийг мэдэгдлээ. Гал зогсоох эвлэрэл Москвагийн цагаар тавдугаар сарын 8-ны 00:00 цагаас хүчин төгөлдөр хэрэгжиж эхэлсэн бөгөөд Москвагийн цагаар тавдугаар сарын 11-ний 00:00 цагт дуусгавар болох юм. Үндсэндээ 72 цаг дайны фронтод гал зогсоох юм.

ОХУ-ын Ерөнхийлөгч дөрөвдүгээр сарын сүүлээр Ялалтын баярын үеэр гал зогсоох тухай ярьсан ч Украины тал болон барууны хэд, хэдэн улс үүнд итгэлгүй өнөөг хүрсэн юм. Өнгөрсөн удаад хоёр ч удаа гал зогсоох тухай ОХУ-ын талаас хэлсэн ч начир дээрээ хэрэгжихгүй байсаар өнөөг хүрсэн учраас барууны улс орнууд итгэхгүй байгаагаа илэрхийлсэн байна. Одоогоор ОХУ Ялалтын баярын үеэр гал зогсоох нь хэлбэрэлтгүй хэрэгжиж эхэлсэн гэж байгаа ч дайны фронтод хэрэгжих эсэх нь эргэлзээтэй байна.

Сүүлийн өдрүүдэд Украины талаас ОХУ-ын нийслэл Москва хотын агаарын орон зайг хэд, хэдэн удаа зөрчиж, бусад хотуудад дронын халдлага үйлдэж байгаатай холбоотойгоор өчигдөр олон улсын ихэнх нислэгүүд түр зогссон билээ.