БНХАУ-ын зүүн хойд хэсгийн Лиаонинг мужаас тус улсын баруун өмнөд нутагт орших өөртөө засах Юннань мужийн Шишуанбанна Дай хотод аялж явсан 37 жуулчинг гудасны дэлгүүрт барьцаалсан хэрэг гарчээ. Байлу Видеод өнгөрсөн сарын 26-нд нийтэлсэн бичлэгээс үзэхэд гудасны дэлгүүрийн ажилчид жуулчдыг худалдаа хийсэнгүй хэмээн бухимдаж, орлого оруулахаас нааш гаргахгүй гээд хаалгаа хаан зогссон байна. Жуулчдыг хэр удаан барьцаалсан нь тодорхойгүй ч бичлэгийг хийсэн хүний хэлснээр жуулчид дэлгүүрт долоон цаг орчим хашигдсан бололтой. Лиаоннинг юүде трэйвель сервис компанийн зохион байгуулсан Юннанийг зорих энэ аялал нь хүн тус бүрийн 3979 юань буюу 550 ам.долларын үнэтэй ч ийм таагүй үйл явдал тохиолдсонд бухимдсан үйлчлүүлэгчид албаныханд гомдол гаргажээ. Холбогдох албаныхан хэргийг шалгаж, дэлгүүрийг эзэмшдэг Тайси Дика компанийн үйл ажиллагаа явуулах зөвшөөрлийг хурааж, орон нутгийн хөтөчийг 10,000 юань буюу 1,400 ам.доллараар торгожээ. Мөн бусад аяллын компанид явуулж буй шалгалт үргэлжилж байгаа гэнэ.

Дээрх хэрэг Хятадын сошиал орчинд шуугиан дэгдэээж, жуулчдад хүчээр тулган худалдаа хийдэг явдалыг төр засгаас анхаарч хатуу арга хэмжээ авахыг иргэд шаардаж эхэлсэн байна. Хятадад аяллын хөтөч нар орон нутгийн дэлгүүртэй тохиролцож, жуулчдад “бараа шахах” үзэгдэл түгээмэл байдаг ба үе, үе хэл ам таталдаг юм.

Жишээ нь, өнгөрсөн хоёрдугаар сард 7,000 ам.долларын үнэтэй алтан зүүлт худалдаж авахаас татгалзсан нэг гэрийн таван хүнийг хөтөч нь аяллын группээсээ хөөжээ. Түүний өмнө буюу өнгөрсөн оны наймдугаар сард өмнөд Хятадын нэгэн аяллын хөтөч эко аяллаар яваа жуулчдыг худалдаа хийхийг тулгаж, ёс бус үгээр доромжилж байгаа бичлэг сошиалд тарж, албаныхан хэргийг шалгаж, хариуцлага тооцож байсан байна.