Унгарын Засгийн газар олон хүүхэдтэй эхчүүдийг орлогын албан татвараас бүрэн чөлөөлөх бодлого хэрэгжиж эхлээд удаагүй байна. Тус улсын эхчүүд татварын дараах хөнгөлөлтүүдийг эдэлнэ:

-Нэг хүүхэдтэй эх 30 нас хүртэл орлогын албан татвар төлөхгүй
-Хоёр эх 2025 оны 10-р сараас эхлэн орлогын албан татвар төлөхгүй
-Гурван хүүхэдтэй эх 2026 оны 1-р сараас эхлэн орлогын татвар төлөхгүй
-Дөрөв болон түүнээс дээш хүүхэдтэй эх ямар нэгэн байдлаар татвар төлөхгүй

Унгарын Ерөнхий сайд Виктор Орбан өнгөрсөн хоёрдугаар сард мэдэгдэхдээ “Европ тэр дундаа барууны улс орнуудын хувьд эхчүүдийг дэмжих татварын хамгийн том шинэчлэл. Энэ бодлого бол гэр бүлийн суурин дээр үүсэн бий болох Унгарын эдийн засгийн шинэ эрин үе” гэж тодорхойлсон юм.

Унгар улс эхчүүдэд хий дэмий хоосон амлалт, мөнгө, одон медаль гардуулахаас илүүтэй татварын бодит дэмжлэг олгох ёстой гэж олон жил маргасны эцэст энэ бодлого ийнхүү хэрэгжиж эхэлж байна. Орбаны засаг захиргаа аавуудыг ч орхигдуулахгүй байхаар шийджээ. Учир нь тус улсад хэдэн хүүүхдэтэй байгаагаас хамааран сар бүр 26-430 ам.долларын тэтгэмжийг аавууд ч авдаг байхаар зохицуулалт хийсэн байна. Тус улс ирэх жилүүдэд олон төрлийн татварыг цөөлж, үр дүнтэй цөөн төрлийн татвартай болохыг зорьж буй юм.

Унгар улсад төрөлт огцом буураад байна. Тус улсын статистикийн төв хорооны мэдээлснээр 2024 онд 77.5 мянган төрөлт бүртгэгдсэн нь 1949 оноос хойш хамгийн бага өсөлт аж. Тиймээс төрөлтийг нэмэгдүүлэх үүднээс татварын хөнгөлөлт эдлүүлэх шийдвэр гаргажээ. Түүнчлэн ипотекийн зээлийн хүүг энэ сараас эхлэн 5% болгоод байна.