Гэгээн ширээт улсын тэргүүн, Ромын пап Францис өчигдөр таалал болсны дараа Ватиканаас түүний гэрээслэлийг нийтэд зарлалаа. Ромын Пап “Намайг Гэгээн Мариагийн сүмд эгэл даруухнаар оршоогоод, булшин дээр минь Францис гэх нэрнээс өөр юу ч бүү бич”  гэж гэрээслэжээ.

Ромын пап Францис санваар хүртэн Буэнос-Айресийн сүмийн хамба байхаас авахуулаад кардинал, эцэст нь Католик шашны тэргүүн болох хүртлээ эгий даруухан гэдгээрээ нийтэд танигдсан нэгэн. Ромын пап болохдоо ч тансаг чамин ордонд суухаас илүүтэй Ватиканы зочдыг угтах хэсэгт суурьшиж байсныг хэвлэлүүд онцлон бичиж байна. Тэрбээр мөн элдэв чамирхалгүй энгийн модон авсанд оршуулахыг гэрээслэжээ.

Ромын пап жанч халснаас хойш 4-6 хоногийн дотор Гэгээн Петрийн талбайд оршуулах ёслол үйлдэх ёстой. Түүнээс өмнөх папууд бүгд Гэгээн Петрийн сүмд оршдог ч Францис пап ламтан өнгөрсөн жил тогтсон дэг жаягт өөрчлөлт оруулж Ромын Гэгээн Мариагийн сүмд, Мадонна эх дагинын ойролцоо оршоохыг  захисан билээ.

Гашуудал 15 хоног үргэлжлээд, түүний орыг залгах шинэ Папыг 15-20 хоногийн дотор Кардиналуудын зөвлөлийн санал хураалтаар сонгодог уламжлалтай. Шинэ Папыг тодруулах хуралдаанд 135 кардинал оролцож, санал өгөх учиртай. Үүний бараг 80 хувийг Францис Пап ламтан сонгосон байдаг юм.