Католик шашны тэргүүн, Ромын пап Францис 88 насандаа таалал төгслөө. Дэлхийн католик шашны түүхэнд Америк тивээс тэр дундаа, Өмнөд Америкаас сонгогдсон анхны пап ламтныг таалал төгссөн тухай Ватиканы зүгээс албан ёсоор баталгаажууллаа. Тэрбээр энэ оны хоёрдугаар сараас бронхит нь хүндэрч, улмаар хоёр уушгиндаа хатгалгаа туссанаар эмнэлэгт хэвтэн өнгөрсөн гуравдугаар сарын 23-ны өдөр эмнэлгээс гараад байсан билээ. Хамгийн сүүлд өчигдөр Улаан өндөгний баярын олон нийтийн арга хэмжээнд оролцон нийтэд харагдсан юм. АНУ-ын дэд ерөнхийлөгч Ж.Д.Венс өнгөрсөн амралтын өдөр Ватиканд айлчилж Францис паптай уулзсан билээ. Тухайн үед Америкийн шар голдуу хэвлэлүүд Францис папын биеийн байдал хүнд байгаа тухай мэдээлж байсан юм.

Ромын пап лам Францис 1936 оны 12-р сарын 17-ны өдөр Аргентинд төрсөн. Ээж талаасаа итали гаралтай. 1958 оноос сахил хүртэн лам болж, 1990-ээд оныг дуустал Аргентин улсын католик шашны тэргүүн хамбаар ажиллаж байсан. Улмаар Ромын пап II Йоан Павел түүнийг 2001 оны хоёрдугаар сарын 21-ний өдөр кардиналаар сонгосон юм. Тэрбээр 2023 оны гуравдугаар сарын 13-ны өдөр Ромын шашны тэргүүн, папын суудалд заларсан билээ.

Ромын пап Францис 2023 оны есдүгээр сарын 1-ний өдөр Монгол Улсад албан ёсоор айлчилсан юм. Тэрбээр Монгол Улсад айлчилсан анхны пап болж түүхэнд нэрээ үлдээсэн билээ. Түүний айлчлалыг сурвалжлахаар 23 орны 160 орчим сэтгүүлчид ирж, дэлхий дахин Монгол Улсын зүг хараагаа бэлчээж эхэлсэн юм. Тэрбээр Монгол Улсад айлчлахдаа Ватиканы нууц архиваас Гүюг хааны 777 жилийн дараа Пап IV Иннокентид илгээж байсан захидлын албан ёсны анхны хуулбарыг гардуулсан билээ.