ОХУ-ын дарангуй хуулийг хэрэгжүүлэх гэлээ хэмээн Засгийн газартаа эгдүүцсэн хэдэн мянган гүрж иргэн Тбилис хотын гудамжинд жагсаал зохион байгуулж байна. Гүржийн эрх баригч Гүржийн мөрөөдөл нам жилийн өмнө буцаагдсан гадаадын агентийг тус улсын нутагт хориглох тухай хуулийн төслийг дахин өргөн барьснаас ийн олон нийтийг бухимдалд хүргэжээ. Уг хуулиар хэвлэл мэдээллийн хэрэгсэл, ашгийн бус байгууллага төсвийнхөө 20%-иос дээш хувийг хилийн чанадаас бүрдүүлсэн тохиолдолд “Гадаадын агент”-д тооцох юм байна. Гэхдээ энэ удаад нэршлийг багахан өөрчилж, “Гадаадын нөлөөллийн агент”, “Гадаадын эрх мэдлийн төлөөх ашиг сонирхлоор хөөцөлдөн” болгожээ. Өмнөх хуулийн төслийг өргөн барихад Брюссель, Вашингтоны зүгээс ОХУ-д хэрэгжүүлдэг хараат бус хэвлэл мэдээлэл, байгууллагуудыг хяхан хавчих зорилготой хуультай тун төстэй байгааг шүүмжилж байсан юм. Гүржийн Ерөнхийлөгч Саломэ Зоурабичвили ард түмнийхээ талд зогсож, уг хуулийн төслийг эрх чөлөө, боолчлолын хоорондын сонголтыг төлөөлсөн хууль гэж шүүмжилжээ.