Монголын говиос нүүрсний давхаргын метан хийн хайгуул хийж буй “Jade Gas”-ын нөөц өссөн тухай мэдээлэл дэлхийн хэвлэлээр ч, манай хэвлэлээр ч “од” болов. Австралийн хөрөнгийн биржид бүртгэлтэй “Jade Gas Holdings” компани Өмнөговь аймагт орших “Улаан нуур” нүүрсний давхаргын метан хийн ордод хайгуул хийдэг. Төслийн талбайдаа хоёр дахь хэвтээ цооног өрөмдөж. Өрөмдөөд 802 метр зузаантай нүүрсний хийн давхарга байгааг тогтоож. Сүүлд өрөмдсөн хоёр хэвтээ цооногийн илэрсэн зузаантай нийлээд нийт 1500 метр зузаантай метан хийн нөөцтэй болж. Ингээд Австралийн хөрөнгийн биржийн “бага, залуу” компанийн хувьцаа 20% давж өслөө.

Австралийн “Jade Gas Holdings” компанийн цахим хуудаст тэргүүлэх төсөл нь Тавантолгойн ордын метан хий төсөл гэдгийг онцлон дурджээ. Одоогоос таван жилийн өмнө буюу 2020 оны дөрөвдүгээр сард уг төслийн талбайд “Эрдэнэс Метан” компанитай бүтээгдэхүүн хуваах гэрээ байгуулсан байна. Улмаар “Метан гас ресурс” компанийн эрх үүргийг шилжүүлжээ. Компанийн танилцуулгад дурдсанаар төслийн талбайн “Улаан нуур” ордын бүсэд долоон цооног өрөмдөж дуусгасан бөгөөд их хэмжээни хий агуулсан нүүрсний судал илрүүлжээ. Метан хийн найрлага нь III давхаргад 98%, IV давхаргад 92.5% байгааг тогтоосон бөгөөд тонн тутамдаа 12-18 куб.метр хий агуулж байгааг тогтоосон байна.

“Өрөмдлөгийн үр дүнгээс харахад Улаан нуурын байгалийн хийн орд ирээдүйд дэлхийн хэмжээний голлох үйлдвэрлэгч болох итгэлийг улам нэмлээ. Бид эхний хоёр олборлолтын цооногын ажлыг аль болох эрт дуусаж, олборололтоо эхлүүлнэ” гэж тус компанийн ТУЗийн дарга Деннис Мортон ярьжээ.

Өнгөрсөн жил тус компани “Улаан нуур”-ын ажлыг түргэсгэхийн тулд Хятадын “Ян Ан Дриллинг” компанитай хамтран ажиллажээ. Улмаар тус компани олборлосон хийгээ Байгалийн шахсан хий болгон бусад компанид нийлүүлэхээр судалж байна.