Майкрософт компанийн програм хангамжийн инженер мэргэжилтэй, 42 настай Кристофер Пенс “дарк веб” буюу хориотой интернет сүлжээ ашиглан алуурчин хөлсөлсөн гэм буруутай нь тогтоогдож, Нью-Йорк мужийн Хойд дүүргийн шүүхээс долоон жил хорих ял шийтгэжээ. Хэрэгтэн өөрийнх нь үрчилж авсан таван хүүхдийн төрсөн эцэг эх тэднийг хүчирхийлдэг байжээ гэж бодоод дээрх үйлдлийг хийхээр шийдсэн гэж мэдүүлээд 35 настай эрэгтэй, 38 настай эмэгтэйн амь насанд халдах хэргийг 2021 оны арванхоёрдугаар сард зохион байгуулсан гэм буруутайгаа хүлээсэн байна. Гэхдээ тэр санасандаа хүрч чадалгүй баривчлагджээ. Яллагдагч 2021 оны долоодугаар сард хэрэглэгчийн мэдээллийг нууцалдаг систем ашиглан анх хориотой интернет сүлжээнд нэвтэрсэн. Мөн алуурчин хөлслөх захиалгадаа 16,000 ам.доллартай тэнцэх хэмжээний Биткойн төлсөн нь ч мөрдөн байцаах явцад нотлогджээ. К.Пенс нь 2021 оны арванхоёрдугаар сард Юта мужийн Седар дахь нэг сая ам.долларын үнэтэй байшингаасаа цагдаа нарт баривчлагдаж, өнгөрсөн долоо хоногийн пүрэв гарагт шүүхээр орж, ял сонсох хүртлээ холбооны шоронд саатуулагдаж байсан юм.