Украинийн талаас ОХУ-ын нефть боловсруулах үйлдвэрүүдэд дроноор халдах нь олширч шатахууны хомсдолд орсон тохиолдолд 100,000 тонн шатахуун нийлүүлэхэд бэлдэх хүсэлтийг Казакстанд тавьсан талаар Ройтерс агентлаг уламжиллаа. Шатахуун үйлдвэрлэгч эх сурвалжийн мэдээлснээр хоёр тал Казакстаны шатахууны нөөцийг ашиглах тохиролцоонд хэдийн хүрсэн. Гэхдээ Казакстаны Эрчим хүчний сайдын зөвлөх ОХУ-ын талаас ийм хүсэлт тавьсан гэх мэдээллийг үгүйсгэж буй гэв. Хэдийгээр уг тохиролцоог нууцлахыг завдаж буй ч Казакстаны талын шатахуун үйлдвэрлэгч гурван эх сурвалж дээрх мэдээллийг өгсөн болохоор Кремль Астанагаас шатахуун “царайчилсан” нь эргэлзээгүй хэрэг гэж олон улсын ажиглагчид үзэж байна. Дайн эхэлснээс хойш ОХУ-ын тал Украинийн чухал дэд бүтэц рүү халдаж, хорлон сүйтгэсээр ирсэн тул Киев Оросын нефть боловсруулах үйлдвэрүүдийг устгаж, хариу барьж эхэлжээ. Одоогийн байдлаар Украинийн тал ОХУ-ын нефть боловсруулах хүчин чадлын 10%-ийг устгасан гэж Их Британийн Батлан хамгаалахын сайд өнгөрсөн сарын сүүлээр мэдэгдэж байсан билээ.