ХБНГУ-ын Бонн хот дахь НҮБ-ын байранд Байгаль орчин, уур амьсгалын өөрчлөлтийн сайд С.Одонтуяа, Цөлжилттэй тэмцэх НҮБ-ын конвенцын гүйцэтгэх нарийн бичгийн дарга Ибрихам Тиав нар Монгол Улс “Цөлжилттэй тэмцэх талуудын 17-р бага хурал-COP 17”г зохион байгуулах орон болохыг баталгаажуулж гарын үсэг зурлаа. Ингэснээр 2026 онд Цөлжилттэй тэмцэх тухай НҮБ-ын конвенцод нэгдэн орсон 197 орон Монгол Улсад чуулах юм.

Монгол Улсын хувьд тус хурлыг зохион байгуулах хүсэлтээ илэрхийлэн, 2022 оны тавдугаар сард олон улсын түвшинд дэмжүүлсэн түүхтэй. НҮБ-ын судалгаагаар манай улсын газар нутгийн 76.9 хувь нь цөлжиж, бэлчээрийн доройтолд хүрэн малчдын уламжлалт ахуй, биологийн олон янз байдал алдагдаж байгаа гэж дүгнэсэн нь бий. Монгол Улс 2026 оныг “Бэлчээр, бэлчээрийн малчдын олон улсын жил болгох санаачилга дэвшүүлж, үүнийг НҮБ-аас дэмжсэн юм. Монгол Улсад болох COP17 хурлын үеэр зохион байгуулагч орон болох Монгол Улс “Ирээдүйн бэлчээрийн олон улсын эвсэл” байгуулах санал дэвшүүлэхээр төлөвлөж байна.

Энэхүү хурал нь уур амьсгалын өөрчлөлтийн эсрэг гарц гаргалгаа, шийдэл хайн, тал, талын туршлагыг нэгтгэн солилцож, төсвийн дэмжлэг шаардлагатай санаачилгад нэмэлт санхүүжилт олгодог юм.