ОХУ-ын Ерөнхийлөгч Владимир Путин Сирийн шилжилтийн үеийн ерөнхийлөгч Ахмед аш-Шара нар өчигдөр/2025,02,12/ утсаар ярьсан тухай Кремлийн хэвлэлийн алба мэдээлснийг CNN агентлаг дамжуулав. Сирийн шинэ удирдлагад тулгараад буй олон бэрхшээлийг ард түмнийхээ сайн сайхны төлөө шийдэхэд нь Оросын Төрийн тэргүүн амжилт хүсэж, боломжит хүчин чадлаараа дэмжлэг үзүүлэхээ амласан байна. “Сирид үүссэн өнөөгийн нөхцөл байдлын талаар дэлгэрэнгүй санал солилцлоо. Оросын тал тус улсын эв нэгдэл, тусгаар тогтнол, нутаг дэвсгэрийн бүрэн бүтэн байдлыг дэмжих зарчмын байр сууриа илэрхийллээ" гэж Кремлийн хэвлэлийн мэдээнд онцолжээ. В.Путины зүгээс Сирийн нийгэм, эдийн засгийн байдлыг сайжруулахад туслахад бэлэн гэсэн байна. Хямралын дараах сэргээн босголтод Орос улс Сирид туслахад бэлэн байна гэж НҮБ-д суугаа ОХУ-ын байнгын төлөөлөгч Василий Небензя өмнө нь мэдэгдсэн юм. Тэрбээр сиричүүд тулгарч буй бэрхшээлүүдийг гадаадын хөндлөнгийн оролцоогүйгээр шийдэх, гаргалгаа олох, даван туулах чадвартай гэдэгт Москва эргэлзэхгүй байна гэжээ.