АНУ-ын Алабама мужийн иргэн 32 настай Сузанна Манусын татаж байсан цахилгаан тамхи дэлбэрч машин нь юу ч үгүй шатаж, хөлдөө их хэмжээний түлэнхийн шарх авсан хэрэг гарчээ. Хурдны замаар 120 км/ц хурдтай явахад татаж байсан цахилгаан тамхи нь гэнэт дэлбэрч машин дотор гал авалцаж, хөл нь шатаж эхэлжээ. Аргаа барсан эмэгтэй амиа аврахын тулд машинаа яаралтай замын хажуу руу зогсоож, үсэрч гарсны хүчинд амьд үлдсэн байна. Хоёр хүүхдийн ээж тэрбээр замын хажууд түргэн тусламж ирэхийг хүлээж, Дотан хотын Флауэрс эмнэлэгт хүргэгдэн шархаа боолгосон байна. Эмч нарын ярьж буйгаар эмэгтэйн гуяны ар, өвөр хэсэг нэлээд гүн түлэгдсэн тул дахиад жаахан хугацаа алдсан бол мөч тайрах мэс засал хийх аюултай байсан гэжээ. С.Манус цахилгаан тамхи нь чухам ямар шалтгааны улмаас болж дэлбэрснийг мэдэхгүй. Гэнэт тасхийх чимээ гараад автомашины бүхээгт гал авалцаж эхэлсэн гэж орон нутгийн цагдаад мэдүүлэв. Мөн тэрбээр шархаа хараад зомбины дайралтанд өртсөн юм шиг аймшигтай харагдсан гэж хэвлэлийнхэнд ярьжээ.