АНУ-ын Ерөнхийлөгч Дональд Трамп өнгөрсөн ням гарагт Колумбаас тус улсад нийлүүлдэг бүх төрийн бараанд эдийн засгийн хориг арга хэмжээ авч, ихээхэн хэмжээний тарифф тогтоож буйгаа мэдэгдлээ. Шалтгаан нь цагаач колумбуудыг нутагт нь хүргэж өгөхөөр очсон цэргийн тээврийн хоёр онгоцыг Колумбын эрх баригчид хүлээж авахаас татгалзсан юм. Хэдийгээр Ерөнхийлөгч Густаво Петро зүүнийг баримтлагч ч гэлээ АНУ-тай найрсаг харилцааны бодлого баримталж, АНУ-ын чухал холбоотон орон билээ. Энэ ч утгаараа Колумб улс нь АНУ-ын хамгийн том худалдаа, хөрөнгө оруулагчийн хамтрагч бөгөөд 2022 онд хоёр орны худалдаа, үйлчилгээний эргэлт 39 тэрбум ам.долларт хүрч байсан юм. Г.Педрогийн хувьд колумб цагаачдыг гэмт хэрэгтэн, хоригдол мэт үзэж, цэргийн онгоцоор бөөнөөр нь ачаалж, тээвэрлэсэнд ихэд эгдүүцэн энгийн иргэний тээврийн онгоцоор дахин ирүүлэхийг шаардсан байна.

“Би цагаачдыг тэнд нь үлдээ гэж шаардаж чадахгүй, гэвч манай иргэдийн нэр хүндийг бодож, хүн гэж үзэн зохих ёсны хүндэтгэлтэйгээр эх оронд нь буцаах ёстой” гэж Г.Педро Х дахь албан ёсны хаягаараа жиргэжээ. Д.Трамп ч гол холбоотныхоо дээрх үйлдлийг таагүй хүлээн авч кофе тэргүүтэй бүх төрлийн импортын бараанд 25%-ийн тарифф тогтоож, долоо хоногийн дараа дахин нэмж, 50%-д хүргэнэ гэж мэдэгдлээ. Үүгээр ч зогсохгүй Колумбын Засгийн газрын албаныханд хилийн хориг тавьж, томоохон санхүүгийн хориг арга хэмжээ авна гэв. Колубмын талаас ч зүгээр суулгүй АНУ-аас тус улсад нийлүүлэх бүх төрлийн бараанд 25%-ийн тарифф тогтоохоор боллоо хэмээн тус улсын Гадаад худалдааны яамнаас хариу мэдэгдэв. Блүүмберг агентлагийн мэдээлж буйгаар Бразилд тохиолдсон байгалийн гамшгийн улмаас АНУ-ыг зорьсон нийлүүлэлт багасаж, кофений үнэ хэдийн 40%-иар нэмэгдээд байхад Колумбтай үүсгэсэн энэ маргаан, өндөр тариффаас улбаалан дээрх үнэ дахин нэмэгдэнэ гэж мэдээллээ.