Казакстаны Сангийн яамны сайд асан Куандык Бишимбаев өнгөрсөн оны арваннэгдүгээр сарын 09-ний өглөө эхнэр Салтанат Нукеноваг хөнөөсөн хэрэг гарсан бөгөөд энэ хэрэгт холбогдох шүүх хурал өчигдөр тус улсын нийслэл Астана хотод болжээ.

Шүүх хуралдааны үеэр прокурор Айжан Аймаганова гол нотлох баримт болох хэрэг гарсан зоогийн газрын хянах камерийн бичлэгийг үзүүлээд яллагдагч К.Бишимбаев нь хохирогч, өөрийн эхнэр 31 настай Салтанат Нукеноватай ам муруйж эхлэхэд С.Нукенова зайлсхийж, аль болох тайван байхыг хичээсэн нь бичлэгээс харагдана. Гэсэн ч яллагдагч хохирогчийг хананд шахан гар хүрч эхэлснээр энэ эмгэнэлт явдал эхэлсэн. К.Бишимбаев нь хохирогчийн толгойн тус газар хэд хэдэн удаа хүчтэй цохиж, газар унасных нь дараа дэвсэлж, үсдэж дахин босгож ирээд нүүрэн тус газар нь нэг бус удаа хүчтэй цохьсоор байсан. Энэ нь хохирогчийг амиа алдахад хүргэсэн гол шалтгаан болсон гэв.

Уг дүрс бичлэгийг хохирогчийн ах Айтбек Амангельды өнгөрсөн хоёрдугаар сарын 23-нд анх Инстаграм хуудсаараа дамжуулан ил гаргаж байсан юм байна.

Нотлох баримт болон гэрчүүдийн өгсөн мэдүүлгээр яллагдагч К.Бишимбаев хохирогчийг бүтэн найман цагийн турш зодож, тарчлаасан нь эхний ээлжийн мөрдөн байцаалтаар тогтоогдоод байгаа учир Астана хотын дээд шүүх хэргийг хэлэлцэж байна. 

С.Нукенова амиа алдсанаас хойш олон улсын эмэгтэйчүүдийн болон хүний эрхийн төлөө байгууллагууд анхаарал хандуулж, Казакстан дахь гэр бүлийн хүчирхийлэл хэрээс хэтэрснийг хурцаар шүүмжилж, холбогдох хууль журмыг эргэн харах, улам чангатгах шаардлагатайг тус улсын эрх баригчдад сануулсаар байгаа юм.  

Дэлхийн олон орны мэдээллийн хэрэгслээр дээрх харамсалтай хэргийн талаар тасралтгүй мэдээлж, Казакстаны улс төрд нөлөө бүхий хүн холбогдсон учир хөндлөнгийн нөлөөлөлд авталгүйгээр үнэн шударгаар шийдэхийг Казакстаны Дээд шүүхээс хүсжээ. 

Казакстан улс нь 2017 онд гэр бүлийн хүчирхийллийг эрүүгийн хэргийн тооноос хассан байна.