Хип хоп ертөнцийнхөн үе, үе нэгнээ дуугаараа дайрч давшлах явдал гардаг. Энэ жишгээр сүүлийн үед байнга олны анхааралд ороод байгаа Канадын реппер Дрейк, Америк реппер Кендрик Ламар нар юм. Кендрик Ламар “Not Like Us” дисс дуугаараа Дрейкийг бага насны хүүхэд сонирхдог гэсэн нь репперүүдийн хэрүүлийг улам хурцатгаад байгаа. Тэгвэл яг энэ үеэр Дрейк өөрийн харьяалагддаг Универсал Мюзик Группийг шүүхэд өгчээ. “People” сэтгүүлийнхний олж авсан мэдээллээр энэ сарын 15-ны өдөр Нью-Йоркийн Өмнөд дүүргийн АНУ-ын Тойргийн шүүхэд Дрейк гомдол гаргажээ. Өдгөө 38 настай реппер залуу тус студийг Кендрик Ламарын уран бүтээлийг хэвлэн тарааж, зар сурталчилгаа явуулах гэрээ байгуулж, өөрийнх нь эсрэг үйл ажиллагаа явуулсан гэх шалтгаанаар гомдолтой байгаа аж. Ялангуяа, дэлхий даяар хит болсон “Not Like Us” дуугаар Дрекийг педофиль, мөн хүчирхийлэгч гэж гүтгэсэн нь энэхүү зарга мэдүүлэхэд хүргэсэн гэж тайлбарлаж байна.

Универсал Мюзик Групп нь Билли Айлиш, Тэйлор Свифт, Леди Гага, Ариана Гранде зэрэг алдартай оддын уран бүтээлийг хариуцан гаргадаг юм.