Талуудын байгуулсан энхийн гэрээ ирэх ням гарагаас хэрэгжиж эхэлнэ. Ингэснээр Газын зурвас дахь дайн байлдаан бүр мөсөн зогсох нөхцөл бүрдлээ гэж Катарын Ерөнхий сайд мэдэгджээ. Хамасын талаас 33 барьцааны хүн суллах бол Израилийн талаас суллах олзны палестин цэргийн тоо хэдэн зуугаар яригдаж байна. Олон улсын хэвлэлүүдийн дамжуулж буйгаар хэлсэндээ хүрэхийн баталгаа болгож, гал зогсоосон эхний өдөр гурван израиль эмэгтэйг суллана гэж Хамас амлажээ. Тус байгууллагын ахлах албан тушаалтан Бассем Наимийн ил болгосон бичиг баримтаас үзэхэд Израильтай байгуулсан гал зогсоох энхийн гэрээ нь энэ сарын 19-нөөс хэрэгжиж эхлэх бөгөөд тус бүрдээ 42 хоног үргэлжлэх гурван шаттай аж. Гэрээнд зааснаар Хамас бүлэглэл гал зогсоосон эхний өдөр дээр дурдсан гурван израиль эмэгтэйг суллах бол түүнээс хойш долоо дахь хоног бүр дээр Израилийн энгийн иргэд болон цэргийн хоригдлуудыг суллах гэнэ. Энэ жишгээр гэрээний эхний шатны сүүлчийн өдөр гэхэд амласан ёсоороо 33 барьцааны хүнийг бүгдийг нь суллана. Тэгвэл Израилийн талаас ч гэсэн энэ хугацаанд Хамасаас гаргаж өгсөн нэрсийн жагсаалтын дарааллын дагуу палестинийн хоригдлуудыг сулласан байх юм байна. Харин хоёр дахь шатанд, Газын зурваст бүр мөсөн гал зогсоож, бүхий л төрлийн цэргийн ажиллагааг зогсоож, хоёр талын хоригдол солилцоог үргэлжлүүлэн Израиль Газын зурваст оруулсан цэргээ эргүүлэн татна. Ингээд гурав дахь шатанд хоёр талын амь үрэгдсэн хүмүүсийн цогцос болон тэднээс үлдэн юмсыг солилцохоор төлөвлөжээ. Мөн гэрээ хэрэгжих гурав дахь шатыг Газын зурвасыг сэргээн босгох гурваас таван жилийн төлөвлөгөөний эхлэл хэмээн үзэж болох юм байна.