dupontregistry.com - Автомашины түүхэнд хамгийн цуутай домог болон үлдсэн Порш 911 загварын машины хүчин чадлыг Порш 911 Дакар машинаар дахин харуулж, энгийн спорт болон мэргэжлийн өндөр хүчин чадалтай машинуудын ид шидийг цардмал болон бартаат зам дээр дахин гайхууллаа. Тусгай зориулалтын супер машин эзэмшигч Вьетнам эр хэр баргийн хүн туулаад гарахааргүй хатуу ширүүн нутгуудаар аялж, гайхамшгийг үзүүлэв.

Тээврийн компанийн эзэн 54 настай Нгуен Хоанг Ан худалдаж аваад сар гаруйхан болж байсан Парш 911 Дакар загварын машинаараа Хо Ши Мин хотоос гарч Хятадаар дамжин Монголын Говь цөл хүрээд буцаад Вьетнамд хүрсэн 20,000 бээрийн замаар 75 хоног аялжээ. Хэдийгээр Вьетнамаас Говь цөл хүртэл ер бусын гэмээр хол ч гэлээ Зүүн өмнөд Азид хамгийн ойр элсэн манхан хөглөрсөн газар юм. Нгуен Хоанг Ан алс умардад орших говь цөлөөр бартаат замын спорт машинаа унаж давхих мөрөөдлөө хахир хүйтний улирал эхлэхээс өмнө амжуулахаар 2023 оны есдүгээр сард замд гарсан байна.

Дэлхий дээр ердөө 2,500 ширхэг үйлдвэрлэсэн мөнгөлөг металл өнгөтэй 911 Дакар загварын машинаа хамгийн бартаат замд тохируулан шинэчлэн сайжруулж, тоноглоод аяллаа хэд, хэдэн үе шаттай төлөвлөжээ. Эхний шат нь Лаосоор дамжин Хятадын хилд хүрэх. Дараагийн шат нь Хятадын Чинхайд орших үэсгэлэнтэй Чака давст нуурыг үзэх байв. Түүний дараагаар, Тэнгэр уулыг үзээд Монголын Говь цөлийг зорьжээ. Ийнхүү яваар Нгуен Хаонг Ан Монголын говьд ирж, Парш 911 Дакар машиныхаа хурд, хүчийг сорьсон байна.

Гэхдээ замдаа нэг бус удаа чулуу цохиж, зарим нэг эвдрэл гарсныг Монгол Улсын нийслэл Улаанбаатар хотод засуулжээ. Харин тэндээс Вьетнам руу буцах аялал нь цасаар эхэлсэн байна. Гэртээ харих замын туршид сонирхолтой, сэтгэлд хоногшим адал явдалтай олонтаа учирч Нгуен Хоанг Ан, Парш 911 Дакар машин хоёулаа дайрсан газар бүрдээ танигдаж, тааралдсан хүмүүс машиных нь зургийг авч, бичлэг хийж, аян замаа баримтжуулсаар Хятадын олон нийтийн сүлжээнд алдаршаад амжжээ. Аагим халуунаас цастай өвлийн хүйт ортол, халуун орны дулаан уур амьсгалаас өргөн уудам цөл хүртэл хийсэн энэ амаргүй аяллыг ажралгүй туулсан нь бартаат замын Порш 911 Дакар машины хүчин чадал, туулах чадварыг батлан харуулсан аялал болжээ.