Тайванийн Дотоодыг аюулаас хамгаалах товчоо өнгөрсөн ням гарагт нэгэн ноцтой мэдээлэл хийжээ. Тус байгууллагаас өнгөрсөн онд тагнуулын хэргээр баривчилсан БНХАУ-ын иргэдийн талаар товч тайланг тавьсан бөгөөд Тайванийн аралд шургалсан хятад тагнуулын тоо гурав дахин нэмэгдсэн гэх дүн танилцуулсан байна. Жишээ нь, 2021 онд Хятадын 16 иргэнийг тагнуулын хэргээр яллаж байсан бол 2024 онд 64 тагнуул илрүүлж, ялласан гэв. Энэ нь сүүлийн арав гаруй жилийн хугацаанд хамгийн олон тагнуул илрүүлсэн тохиолдол бөгөөд ял сонссон 64 этгээдийн 15 нь цэргийн албанаас чөлөөндөө гарсан бол 28 нь идэвхтэй алба хааж буй тусгай бэлтгэгдсэн мэргэжилтнүүд аж. Энэ нь Бээжингээс Тайванийн цэрэг, төр, орон нутгийн захиргааны байгууллагуудыг тагнан турших нууц ажиллагаа улам өргөжсөний илрэл болж байна гэж Тайванийн Дотоодыг аюулаас хамгаалах товчооноос анхааруулав.

БНХАУ-ын Засгийн газар ардчилсан тогтолцоотой Тайвань арлыг өөрийн нэг хэсэг гэж үздэг бөгөөд нэгдэх саналыг байнга тавьж, шаардлагатай тохиолдолд хүчээр нэгтгэнэ гэж сүрдүүлдэг. Харин Тайванийн Засгийн газар улс орныхоо ирээдүйг 23.5 сая иргэн нь шийдэх ёстой гэсэн байр суурь илэрхийлж, хариу барьдаг юм.