Дэлхий дахинаа бага насны хүүхдийн ухаалаг гар утасны замбараагүй хэрэглээнд анхаарал хандуулж, зохих арга хэмжээ авах болсны адилаар Бразилийн Ерөнхийлөгч Луйз Инасио Лула Да Сильва өчигдөр буюу 2025 оны нэгдүгээр сарын 13-нд холбогдох хуульд гарын үсэг зурж, баталгаажууллаа. Ингэснээр өнгөрсөн оны сүүлээр ижил хууль баталсан Австрали улсын адилаар Бразилийн бүх шатны ерөнхий боловсролын сургуулийн сурагчдын ухаалаг утасны хэрэглээг ирэх хоёрдугаар сараас эхлэн хязгаарлахаар болж байгаа юм. Хуульд зааснаар сурагчид зөвхөн онцгой, аюултай нөхцөл байдалд орсон, боловсрол, танин мэдэхүйн зориулалтаар эсвэл хөгжлийн бэрхшээлтэй юм уу хэрэглэх шаардлагатай тохиолдолд л ухаалаг төхөөрөмж ашиглана. Бразилын Боловсролын яамны сайд Камило Сантанагийн мэдэгдсэнээр ухаалаг гар утас болон төхөөрөмжийн нөлөөгөөр эцэг эхчүүд хүүхдүүдээ сурган хүмүүжүүлэхэд хүндрэл тулгарах болсон тул шинээр батлагдсан хууль тэднийг хүн ёсны үүргээ гүйцэтгэхэд тусална гэдгийг онцлон хэлсэн байна. Мөн тэрбээр дэлхийн олон оронд ижил хууль хэрэгжүүлж, зөвхөн багш нарын удирдлагаар ухаалаг төхөөрөмж хэрэглэдэг болох нөхцлийг бүрдүүлэхийг уриалжээ. Эцэг эхчүүдээс гадна насанд хүрээгүй иргэд ч дээрх хуулийн төслийг дэмжин талархалтайгаар хүлээн авсан гэнэ. Датафольа гэх байгууллагаас өнгөрсөн оны аравдугаар сард явуулсан судалгаагаар Браизилын сургуулийн насны нийт хүүхдийн гуравны хоёр нь сурагчдын ухаалаг утасны хэрэглээг хязгаарлаж, зөвхөн багшийн заавар, зөвлөмжөөр ашигладаг болохыг дэмжсэн бөгөөд дөрөвний гурав нь ухаалаг төхөөрөмж хүүхдэд сайнаас илүүтэйгээр сөрөг муу үр нөлөө үзүүлж байгаа гэдэг дээр санал нэгдсэн байна.