Bloomberg.com – АНУ-ын Лос Анжелес хотын эргэн тойронд гарч буй түймэрт өнөөдрийн байдлаар 12,000 гаруй байшин барилга шатсаны ихэнх нь хэдэн арван жилийн настай амины орон сууц байна. Гэхдээ байгалийн гамшгийг бүрэн бүтэн даван гарсан байшингууд ч бас байна гэнэ. Жишээ нь, уран барилгач Грег Чейзенийн 2024 онд барьсан Песифик Палисайдес дахь галд тэсвэртэй материалаар барьсан, орчин үеийн дизайнтай байшинг нэрлэж болох юм. Галд шатахаас аварсан зүйл нь халуунд тэсвэртэй материалаас гадна гал тархахаас сэргийлэх шийдэл бүхий зохион байгуулалт гэдгийг Г.Чейзен онцолжээ. Уг байшинг Лос Анжелесийн түймрээс аварсан хамгийн том хүчин зүйл бол эргэн тойронд нь босгосон цул бетон хана, хайс гэж архитектор нь тайлбарласан байна. Захиалагч нь хэд, хэдэн удаа гал түймрийн аюулыг дайраад гарсан учир хаширлаж, гал дамжуулагч модон хашааны оронд бетон хэрэм босгосон нь нүдээ олсон шийдэл болохыг бодит галын аюул батлан харууллаа. Хөршийнх нь байшин, үүдэндээ тавьсан машин нь юу ч үгүй шатсанаас үзэхэд галын халуун 1,200 орчим градуст хүрсэний илрэл гэнэ. Тэгэхээр Г.Чейзенийн барьсан галд тэсвэртэй материал төдий хэмжээний халууныг ажрахгүй давна гэсэн үг юм. Иймд хот, суурин газрыг төлөвлөх болон түймэрт шатсан дүүрэг, гудамжуудыг сэргээн босгохдоо галд тэсвэртэй дизайн, зохион байгуулалтыг чухалчлан үзэх хэрэгтэйг дээрх явдал харууллаа. Харин түймэрт өртөлгүй бүрэн бүтэн үлдсэн бусад байшингийн тухайд өндөрлөг газар, бусдаас зайдуу байрлал нь галаас хамгаалах давуу тал болсон байна.