Дэлхийн улс орнуудын удирдагчид ямар нэгэн баяр ёслолоор бие, биедээ үнэ бүхий бэлэг өгдөг. Энэ жишгээр 2023 онд хамгийн үнэтэй бэлэг авсан лидерүүдээр АНУ-ын Ерөнхийлөгч Жо Байден болон түүний эхнэрийг нэрлэж байна. Тэр дундаас гаднынхны сонирхлыг татаж буй хоёр бэлэг нь Энэтхэгийн Ерөнхийлөгч Нарендра Модигийн 20,000 долларын үнэтэй лабораторид ургуулсан алмаз, манай Ерөнхий сайд Л.Оюун-Эрдэнийн өгсөн 3,495 долларын үнэтэй монгол баатар эрийн баримлыг нэрлэж байна.

АНУ-ын Төрийн департаментаас өнгөрсөн долоо хоногийн пүрэв гарагт жил бүр гаргадаг данс бүртгэлийн тайлангаа уламжлал ёсоор гаргажээ. Бэлгийн жагсаалт дотор хамгийн үнэтэйд орж буй Н.Модигоос Жилл Байденд өгсөн 7.5 каратын алмаз байгальд ээлтэй гэдгээрээ онцлогтой. Түүний араас Украинаас АНУ-д суугаа элчин сайдын бэлэглэсэн энгэрийн тэмдэг 14,063 долларын үнэтэй гэнэ. Гэтэл тус улсын Ерөнхийлөгч Володимир Зеленский 2,400 долларын үнэ бүхий зургийн эвлүүлэг бэлгэнд ирүүлжээ. Харин Египетийн Ерөнхийлөгч болон Тэргүүн хатагтайгаас илгээсэн бугуйвч, энгэрийн тэмдэг, гэрэл зургийн цомог нийлээд 4,510 долларын үнэд хүрэх аж.

Жо Байденд ирсэн үнэтэй бэлэгнүүдээс бас нэгэн анхаарал татахуйц нь онц байдал зарласны улмаас хэрэгт ороод байгаа БНСУ-ын Ерөнхийлөгч Юн Сүк Ёлийн 7,100 долларын үнэтэй дурсгалын гэрэл зургийн цомгийг “тун сонирхолтой” гэж гаднын хэвлэлүүд онцолжээ. Гэтэл баян тансагаараа алдартай Бруней улсын “үрэлгэн хаан” гэгддэг Хассанел Болькиа султан ердөө 3,300 долларын үнэтэй мөнгөн аяга бэлэглэсэн гэхэд олон нийтэд жаахан чамлангуй санагдсан гэнэ. Үүнтэй төстэй бэлэг гэвэл Изриалийн Ерөнхийлөгчийн 3,160 долларын үнэтэй мөнгөн царыг нэрлэж болох юм.

АНУ-ын Холбооны хуульд зааснаар төрийн тэргүүнд ирэх гадаадын лидерүүдийн бэлгийн үнийн доод хэмжээг 480 доллар гэж заасан байгаад шаардлагатай гэвэл ирсэн бэлгийг Үндэсний архивын газарт шилжүүлж, тэнд нь хадгалдаг байна. Дээр дурдсан 20,000 долларын алмазын тухайд Тэргүүн хатагтай өөртөө авна гэж мэдэгдээгүй учраас Цагаан ордоны Зүүн жигүүрийн албан хэрэглээнд шилжүүлнэ гэж Жилл Байдений бие төлөөлөгч Ванесса Валдивиа мэдээлжээ.