Телеграф сонины мэдээлснээр Иран улсад 2024 онд 1,000 гаруй хүнд хуулийн дээд хэмжээ оноож, цаазаар аваачсанаас 70%-ийг нь тус улсад шинээр гарч ирсэн “шинэтгэгч” Тодотголтой Ерөнхийлөгч Масуд Пезешкианыг албан ажлаа авснаас хойшх хугацаанд гүйцэтгэсэн байна. Нарийвчилбал, 695 хүн өнгөрсөн наймдугаар сараас хойш цаазын ял сонссон гэнэ. Тэгэхээр, М.Пезешкиан нь хагас жил ч хүрэхгүй хугацаанд ийм олон тооны хүнийг цаазаар аваачсан нь сонгуулийн үеэр амлаж байсан шинэтгэлээ цус асгаруулан эхлүүлснээрээ шүүмжлэл дагуулах боллоо. Тэрбээр өнгөрсөн оны аравдугаар сарын 09-нд олон нийтэд хандан хийсэн мэдэгдэлдээ “хүний эрхийг хамгаалъя гэхийн тулд алуурчдыг цаазаар аваачиж буйг эхлээд эрэгцүүлж нэг үзээрэй” хэмээн цаазаар авах шийдвэрээ зөвтгөж байсан юм.

Олон улсын хүний эрхийн байгууллагуудын гаргасан мэдээллээс харахад Иран улсад сүүлийн гучин жилийн хугацаанд 86 шоронд цаазын ял гүйцэтгэсэн бөгөөд дөч орчим эмэгтэй, насанд хүрээгүйчүүдийг хуулийн дээд хэмжээгээр ялласан байна. Өөр нэгэн мэдээллээр, Иран улс 2023 онд 853 хүнд цаазын ял оноож, даруй гүйцэтгэжээ. Гэхдээ тус улсын хууль зүйн тогтолцоо мэдээллээ маш чанад нууцалдаг тул бодит байдал дээрх тоо үүнээс хамаагүй өндөр байх магадлалтай гэнэ. Учир нь, цаазын ял сонсоогүй ч баривчлагдсан даруйдаа ор сураггүй алга болсон хүний тоо хэдэн мянгаар яригддаг юм байна.