Автозамын ачааллаас үүдэлтэй түгжрэл дэлхийн хүн ам ихтэй, томоохон хотуудын шүдний өвчин болсон. Улс орнууд энэ зовлонгоос ангижрахын тулд төрөл бүрийн арга сэдэж хэрэгжүүлдгээс хамгийн үр дүнтэй нь төлбөр, хураамжийн шийдэл гэдэгт санаа нэгдэх тал цөөнгүй гарах болжээ. Жишээ нь, АНУ-ын Нью-Йорк хот түгжрэлийн хураамж авахаар шийдвэрлэж, үнэ ханшийг тогтоосноос харж болох юм. Тус хотод зорчдог жолооч бүр өдөрт есөн доллар буюу 30,000 гаруй төгрөгийн төлбөр төлөх үүрэгтэй болж байна. Гэхдээ энэ төлбөр тухайн тээврийн хэрэгслийн төрлөөс хамааран янз, янз байх гэнэ. Нью-Йорк хотын хамгийн их түгжирдэг Төв цэцэрлэгт хүрээлэн, Эмпайр Стейт барилга, Таймс Сквейр, Уолл Стрийт зэрэг бүс эхний ээлжинд хураамжтай болжээ. Хотын захиргаанаас ийн шийдвэрлэх болсноо тайлбарлахдаа хотын автозамын түгжрэлийг бууруулж, нийтийн тээврийн сүлжээн шинэчилж, түргэн шуурхай болгож, иргэдийн цаг завыг хэмнэхэд хөрөнгө оруулах зорилго гэлээ. Нью-Йорк хотын захирагч дээрх төлбөрийн тогтолцоог хоёр жилийн өмнө санаачилж, өнөөдрийг хүртэл яригдаж ирсэн ч АНУ-ын Ерөнхийлөгчөөр сонгогдсон Дональд Трамп хүчтэй эсэргүүцдэг бөгөөд иргэд болон бизнес эрхлэгчдийн гомдлын дагуу хэрэгжүүлэх хугацааг нь хойшлуулаад байжээ.