Арабын ертөнцөд дэгдсэн дайны хөлөөс дайжиж, Европ руу гарсан цагаачид сахилгагүйтэхээрээ тус тивийн улс орнуудын толгойн өвчин болж байдаг. Энэ утгаараа Их Британийн эрх баригчид гадаад иргэдийн гэмт хэрэгт холбогдсон үзүүлэлтээр тайлан бэлдэж гаргасан байна. Тайланд хавсаргасан мэдээллээс харахад гадаад гаралтай иргэд болон цагаачид бэлгийн хүчирхийллийн гэмт хэрэг үйлдэх нь бусадтай харьцуулахад гурав дахин өндөр. Англи болон Уэйльсийн цагдаагийн газрын 43 хэлтсийн 41 нь өнгөрсөн оны эхний арван сарын байдлаар 9,000 гаруй гадаад гаралтай иргэнийг бэлгийн хүчирхийллийн хэргээр баривчилжээ. Энэ нь нийт 35,000 бэлгийн хүчирхийллийн гэмт хэрэг бүртгэгдсэний 26.1 хувийг эзэлж байна. Үүн дотроо арабууд “толгой цохьдог” гэж Их Британийн Дотоод хэргийн яам болон Гадаадын иргэн харьяатын газраас мэдээлж, аюулын харанга дэлдэв.

Нарийвчилбал, Их Британийн уугуул иргэдийн 100,000 тутмаас 48 нь бэлгийн хүчирхийлэл үйлдэж баривчлагдсан бол 100,000 цагаач иргэн тутмын 165 нь ижил төрлийн гэмт хэрэг үйлдсэн гэсэн үг юм. Харин бусад төрлийн гэмт хэрэг үйлдсэн тохиолдолыг харьцуулахад гадаад иргэд британичуудаас хоёр дахин өндөр тоотой гарч байна. Өөрөөр хэлбэл, 2024 оны нэгдүгээр сараас аравдугаар сарын хооронд 131,000 гадаад иргэнийг дээрэм, хулгай, танхай, залилан, бусдын амь насанд халдах зэрэг гэмт хэрэгт сэжиглэн баривчилжээ. Хүн ам зүйн талаасаа гадаад иргэд Их Британийн хүн амын есөн хувийг эзэлдэг боловч балмад зан нь ингэтлээ гаарсныг дээрх тайлан харууллаа. Нэн ялангуяа, албани, афганистан, ирак, алжир, сомали зэрэг лалын шашинт орноос гаралтай гадаадынхан бэлгийн хүчирхийллийн хэргээр баривчлагддаг тул орон нутгийн албаныхан араб цагаачдыг онцгойлон анхааралдаа авч эхэлжээ.