Мета компанийн үндсэн суурь болсон Фейсбүүкийн хэрэглэгчид цөөрч байгаа тул хиймэл оюунд түшиглэсэн “хиймэл” хэрэглэгчдийг сүлжээнд нэвтрүүлнэ гэж Файнансиал Таймс мэдээлснээр Марк Цукерберг олон нийтэд таалагдахаа болив. Тус платформыг ашиглан бизнес эрхэлдэг олон хүн байдаг бөгөөд тэдний зар сурталчилгааг улам олон хэрэглэгчид хүргэж, уйдаахгүйн тулд ийнхүү хиймэл хэрэглэгчдийг нэмэхээр болсон гэх боловч бараа, бүтээгдэхүүнийг хэн худалдаж авах вэ гэдэг нэн чухал асуудал үүсээд байна. Өөрөөр хэлбэл, хиймэл оюунд суурилсан хэрэглэгч гэдэг нь сошиал хэрэглэгчдийн нэрлэж заншсанаар “бот”-ууд юм. Гэхдээ Мета компанийн зүгээс хиймэл хэрэглэгчдээ “бот” бус “дүр” гэж нэрлэж байгаа нь буруу шийдвэрээ өмгөөлөх гэсэн өнгөлөн далдлалт гэж сошиал хэрэглэгчид буруушааж байна. Угтаа бол дээрх мэдээллийг гарах хүртэл Фейсбүүкт “бот” ашиглахыг олон жилийн турш хатуу хориглож, “бот” ашиглах үйлдэлтэй тууштай тэмцэж ирсэн юм.