Казакстан улсад өнгөрсөн шөнө зорчигч болон нислэг багийн гишүүд нийлсэн 67 хүн тээвэрлэсэн онгоц осолдож, гуч орчим хүн амьд үлдсэн талаар орон нутгийн албаныхан мэдээллээ. Тодруулбал, Азербайжан Эйрлайнсын J2-8243 нислэгийн онгоцонд гал гарч Казакстаны Актау хотын ойролцоо ослын буулт хийхийг оролдсон ч харамсалтай явдал тохиолдож, 38 хүн амиа алдсан байна. ВВС агентлагийн дамжуулснаар онгоц ОХУ-ын Бүгд найрамдах Чечень улсын Грозный хотыг чиглэн ниссэн ч өтгөн мананд орж, зүгээ алдсан гэнэ. Актау хотоос гурван километрийн зайд ослын буулт хийх үеийн бичлэгээс үзэхэд онгоц дугуйгаа буулган хурдтайгаар газардаж чадсан ч гэнэт гал гарсан байна.

Flightradar24 хуудасны мэдээллээс харахад онгоц орон нутгийн цагаар лхагва гарагийн 03:55 цагт Баку хотоос хөөрөөд 06.28 цагийн үед осолдсон байна. Баталгаатай бус орос эх сурвалжийн мэдээлснээр онгоц мананд төөрснөөс гадна шувуун сүрэгтэй дайралдсаны улмаас сүйрсэн байж магадгүй. Албаныхан онгоцны хар хайрцгийг олж, шалгалт идэвхтэй өрнөж байгаа тул Баку-ОХУ-Грокный-Махачкала чиглэлийн нислэгүүдийг цуцалсан гэж Азербайжан Эйрлайнс мэдээлжээ. Онгоцны тавцанд Азербайжанаас гадна Орос, Казакстан, Кыргызстан улсын иргэд зорчиж явсан байна.