АНУ-ын 47-р Ерөнхийлөгчөөр сонгогдсон Дональд Трампын тангараг өргөх ёслол ирэх оны нэгдүгээр сарын 20-нд Вашингтон хотын Капитол Хиллийн баруун жигүүрт болно. Энэ үйл явдалтай холбоотой нэгэн сонирхолтой мэдээлэл цацагдсан нь АНУ төдийгүй дэлхийн томоохон бизнесменүүд Д.Трампын Тангараг өргөх ёслол зохион байгуулах хороонд сая, сая долларын хандив өргөж буй нь юм.

Жишээ нь, Амазон компанийн Жефф Безос, ОпенЭйАйгийн Сэм Алтман, Марк Цукербергийн удирддаг Фейсбүүкийн толгой компани Мета компани, Уберын Дара Хосровшахи нар тус бүр нэг сая доллар хандивлахаа мэдэгдээд байгаа бол Робинхүүд Маркетсаас хоёр сая долларын хандив өргөх гэж байна. Автомашин үйлдвэрлэгч Форд компани мөн адил нэг сая доллар хандивлахын зэрэгцээ тангараг өргөх ёслол хэрэгтэй унаа, тээврийг шийдэж өгнө гэжээ.

Блүүмберг агентлагийн дамжуулснаар хөрөнгийн сангийн менежер Кен Гриффин тэргүүтэй бусад санхүүгийн лидерүүд багадаа нэг сая доллар хандивлана гэж мэдэгдээд байгаа юм байна.

Тангараг өргөх ёслол зохион байгуулах хороог Ерөнхийлөгчийн сонгуульд ялагч байгуулдаг бөгөөд шинэ засгаас ямар нэгэн ашиг сонирхол харсан бизнес, улс төрийнхөн хандив өргөдөг уламжлал аль эртнээс тогтжээ. Тангараг өргөх ёслолд хандивлагчдын дунд Илон Маскын нэр харагдсангүй. Учир нь, сонгуулийн үеэр хамгийн их хандивыг тэр л Дональд Трампт босгож өгсөн нь 250 сая доллараар яригддаг. Энэ ч утгаараа мань эр энэ удаад өнжихөөр шийдсэн байх гэж хэвлэлүүдээр бижээ.

Дээр дурдсан хороонд хандив өргөхөд татвар ногдуулдаггүй учраас бусад төрлийн арга хэмжээнд хандив өргөхтэй харьцуулахад бичиг цаасны хүндрэл учирдаггүйгээрээ хялбар гэнэ.

Сонирхуулахад, Дональд Трамп 2017 онд Ерөнхийлөгчийн тангараг өргөх ёслолд 107 сая доллар цугларсан нь АНУ-ын түүхэнд хамгийн дээд амжилт тогтоожээ. Түүнээс өмнөх дээд амжилтыг 2009 онд Барак Обама 53 сая доллар цуглуулж, тогтоож байсан юм байна. Удахгүй халаагаа өгөх Жо Байденийн хувьд Тангараг өргөх ёслолын хандивт 62 сая доллар цугларч байлаа. Харин Дональд Трампын хоёр дахь Ерөнхийлөгчийн тангараг өргөх ёслолын хандивт 150 сая доллар цугларна гэсэн тооцоог шинжээчид гаргасан байна.