Тус хоёр компанийн удирдлага нэгтгэлийн ажлыг ирэх зургаан сарын хугацаанд хийж гүйцэтгэснээр нэгэнт эрчийг аваад байгаа Хятадын машин үйлдвэрлэгчидтэй өрсөлдөхүйц дэлхийд гуравдугаарт орох хэмжээний машин үйлдвэрлэгч компанийг шинээр байгуулна гэж мэдэгдлээ. Япондоо гуравдугаарт ордог, арай жижгэвтэр гэж болох Мицүбиши компани хэдийн Ниссантай холбоотон болж, дээрх төлөвлөгөөнд оролцож, хүч нэмэхээр болсон гэв. Хэрэв төлөвлөсний дагуу нэгдсэн компани бий болвол Тоёота болон Волькесвагений дараа орох томоохон автомашин үйлдвэрлэгч олон улсын тавцанд гарч ирэх юм.

Ийнхүү автомашин үйлдвэрлэгчид нэгдсэн тохиолдол нь шинэ үзэгдэл биш юм. Өнгөрсөн зууны эхний аравдаар хэд хэдэн машин үйлдвэрлэгч нэгдэж, Женерал Моторс компанийг байгуулж байсан түүхтэй. Гэхдээ олон компани нэгдсэнээр амжилттай явдаггүйг өнгөрсөн зууны түүхэнд харуулсан гэдгийг салбарын шинжээчид анхааруулсаар байгааг мартаж болохгүй юм. Германы Даймлер-Бенц 1998 онд Крайслер корпорацийг худалдан авч байсан боловч арав хүрэхгүй жилийн дараа задарч байв.