Оросоос гаралтай Жанна Самсонова буюу олон нийтийн сүлжээнд Жанна Д’Арт нэрээрээ алдартай, Инстаграм дээрээ 10,000 гаруй дагагчтай ногоон хоолтон нас барсан нь түүхий жимс, өвс, ургамлаар хооллох нь хүний биеийн эрүүл мэндэд хэр нийцтэй эсэх дээр эргэлзээ төрүүллээ. ОХУ-ын өдөр тутмын хэвлэлд гарсан мэдээллээс харахад өөрийгөө эрүүл хооллодог хэмээн сурталчилдаг 39 настай Жанна өнгөрсөн долоодугаар сарын 21-нд Малайз улсад нас барсан байдалтай олджээ. Хэвлэлүүдийн мэдээлж буйгаар сошиал инфлюнсер бүсгүй шим тэжээлийн дутагдалд орсны улмаас амиа алдсан байна. Харин ээжийнх нь өгсөн мэдээллээр бүсгүй булчин задрах өвчний халдвар авсан нь хэт дэглэмийн улмаас хүндэрсээр аминд хүрсэн гэнэ.

Албаны хүмүүсийн зүгээс бүсгүйн үхлийн шалтгааныг албан ёсоор мэдээлээгүй ч гэлээ найзуудынх нь ярьж буйгаар түүхий жимс, ногоогоор хооллодог байснаас болсон байх талтай гэнэ. Бүсгүйн нэгэн найз “Найз маань байнга өлсгөлөн явдаг учраас нүдэн дээр турж, чөрийж байсан. Бидний зүгээс санаа зовнин хэчнээн анхааруулсан ч үгэнд ордоггүй байлаа” гэж ярьжээ. Мөн нас барахынхаа өмнө бие нь сульдсан ч эмнэлэгт хандахаас зайлхийсээр сүүлдээ алхах ч тэнхэлгүй болж, хэвтэрт ороод байсан байна.

Жанна Самсонова сүүлийн зургаан жилд ус уухаа больж, оронд нь жимс, ногооны шүүсээр шингэнээ нөхөхийг оролддог байжээ.