Африкийн Нигери улсын өмнөд нутгийн Оёо мужийн Ибадан хотын соёл амралтын хүрээлэнд зохион байгуулсан арга хэмжээний үеэр шахцалдаан үүсэж, 35 хүн амиа алдсанаас гадна зургаан хүн хүнд бэртэл аван эмнэлэгт хүргэгдсэн хэрэг гарчээ. Орон нутгийн цагдаагийнхан лхагва гарагт гарсан хэрэгтэй холбогдуулан найман хүнийг баривчлаад байна. Эдгээр баривчлагдсан хүмүүсийн зарим нь арга хэмжээг зохион байгуулахад гол ивээн тэтгэгчээр оролцсон хүмүүс ч багтаж байгаа аж.

Орон нутгийн Агидигбо ФМ радио станцын мэдээлснээр WING буюу Дэмжлэг, зөвлөгөө хэрэгцээт эмэгтэйчүүд байгууллагын санаачилгаар зохион байгуулсан арга хэмжээнд 13 хүртэлх насны 5,000 хүүхэд үнэ төлбөргүй оролцож, төрөл бүрийн хөгжөөнт тоглоомоор дамжуулан олон сонирхолтой бэлэг, шагналаар урамшуулж, ивээн тэтгэлэг олгох зорилготой байжээ. Гэвч олон хүний аминд хүрсэн харамсалтай хэрэг болсон нь Нигерийн Ерөнхийлөгч Бола Тинубуг төлөөлөгчөөрөө дамжуулан эмгэнэл илэрхийлэхэд хүргэсэн юм. Харин дээр дурдсанаар баривчлагдсан найман хүнийг олон нийтийг хамарсан арга хэмжээг зохион байгуулахдаа дутагдал гаргаж, аюулгүй байдал хангаж чадаагүй гэх үндэслэлээр буруутган хариуцлага тооцох гэнэ.