Саяхан Лаос улсад жуулчид уух юмнаас хордсон хэрэг гарсан. Үүнтэй төстэй хэрэг Фижи улсад гарч долоон хүн хордлогод орсон байна. Ингээд Номхон далайн өмнөд хэсэгт орших Фижи улсад аялж яваад коктейльд хордсон гэх долоон өвчтөний уух зүйлсэд хийсэн хорын шинжилгээний хариу гарсан ч метилийн спирт болон ямар нэгэн төрлийн хорт бодис илрээгүй гэж тус улсын эрх баригчид мэдэгджээ. Фижигийн Ерөнхий сайдын орлогч Виламе Р.Гавока хэрэгтэй холбоотой шинэ мэдээлэл өгөөд жуулчдын зорих дуртай тансаг зэрэглэлийн амратын газарт ийм харамсалтай явдал тохиолдсонд гүнээ харамсаж буйгаа илэрхийлэн хохирогчид болон тэдний ар гэрийнхнээс уучлалт гуйсан байна.

Австралийн дөрөв, аль улсынх нь тодорхойгүй гурав, 18-56 насны долоон жуулчин өнгөрсөн долоо хоногийн бямба гарагт пинья колада коктейль уусны улмаас хордлогонд орж, дотор муухайрах, бөөлжих зэрэг шинж тэмдэг илэрч эмнэлэгт хүргэгдсэнээс аялал жуулчлалаараа алдартай Фижигийн нэр хүнд олон улсын тавцанд унаад байсан юм. Ерөнхий сайдын орлогч бөгөөд Фижигийн Аялал жуулчлалын яамны сайдын албыг давхар хашдаг ноён Гавока жуулчдын эрүүл мэнд юунаас болж, дордсоныг тодорхойлох боломжгүй байгаа ч тэдний биеийн байдал хэвийн болж, хэвтэн эмчлүүлж байсан Латока эмнэлгээс гарсан гэж мэдэгджээ.