Биедээ олон тооны шархтай, удаан хугацаанд хүчирхийллийн золиос болсон шинжтэй, 10 настай Сара Шариф охины цогцос гэрээсээ олдсон хэрэг өнгөрсөн жилийн намар Англид гарсан. Лондон хотын цагдаагийн газраас хэргийг шалгаж, буруутай этгээдүүдийг илрүүлсэн бөгөөд талийгч охины аав 42 настай Урфан Шариф, хойт эх 30 настай Бейнаш Батүл, авга ах 29 настай Файзал Малик нар байв. Лондон хотын Эрүүгийн гэмт хэргийн төв шүүх уг хэргийг шүүж, хохирогч охины аав, хойт эх нарт бүх насаар нь хорих ял, авга ахад 16 жил хорих ял тус, тус оноожээ. Задлан шинжилгээнийхний хийсэн дүгнэлтээр хохирогч охиныг төрсөн эцэг, хойт эх нь удаан хугацаанд хүчирхийлсэн, тамлан зовоосон улмаар аминд хүрсэн гэх үндэслэлээр буруутгаж, хуулийн дагуу тохирох шийтгэлийг нь хүртээжээ. Харин авга ах Файзал Маликын тухайд гэмт хэрэг нуун дарагдуулсан, харсаар байж бусдын амь нас, эрүүл мэндийг аюулд учруулсан гэх үндэслэлээр шүүн тасалсан гэж ВВС агентлаг мэдээлжээ. Охиныг нас барсны дараа дээрх гурван этгээд Пакистан руу зугтан гарч охины аав Их Британийн цагдаагийн газартай утсаар холбогдож “түүнийг хууль ёсоор шийтгэсэн, тиймээс үхсэн” гэж мэдүүлжээ. Гэхдээ охиныг байнга зоддог байсан ч хөнөөх санаа агуулаагүй байсан гэж шүүх дээр мэдүүлсэн аж.
Гэмт этгээд дээрх байдлаар мэдээлэл өгсний дараа буюу 2023 оны наймдугаар сарын 10-нд цагдаа нар гэрт нь очиж үзэхэд охины цогцсыг орон дээр хэвтүүлэн, хөнжлөөр бүтээгээд орхисон байжээ. Иймд Их Британийн цагдаагийн газар Пакистаны талтай хамтран ажиллаж, нэг сарын дараа гэмт этгээдүүдийг баривчилж, Лондонд аваачсан байна. Хэргийг шүүн тасалсан Эрүүгийн гэмт хэргийн төв шүүхийн гаргаж тавьсан нотлох баримтаар охины цогцосыг олох үед 70 гаруй шинэхэн шарх, сорвиноос гадна эдгэрч, аньсан хуучин шарх олон тоогоор олджээ.