Хэдийгээр Москва болон Пхеньянаас албан ёсоор мэдэгдээгүй ч Умард Солонгосын цэргүүд Украинийн дайнд оролцож, Куркс мужийн орчимд байлдаж байгаа гэж АНУ, Украин, Өмнөд Солонгосын тагнуулын газраас мэдээллээ. Албан ёсны мэдээллээр 20,000 гаруй умардын цэрэг байлдааны бэлтгэл хийхээр өнгөрсөн аравдугаар сараас эхлэн ОХУ-д байрлаж байсан бол өнөөдрийн байдлаар 11,000 гаруй цэрэг Украинд байлдаж эхэлсэн гэж дээр дурдсан тагнуулын байгууллагууд тайлагнасан байна.

Дэлхийн хамгийн тусгаарлагдсан, нууцлаг орон Умард Солонгосын цэргүүд эх орноосоо асар хол газар, Дэлхийн хоёрдугаар дайнаас хойшх Европын хамгийн том сөргөлдөөнд оролцож явна. Гэвч, Умардын талаас хүн хүчний ихээхэн хохирол амсаж эхэлсэн гэх мэдээллийг барууны хэвлэлүүдээр уламжилж байна. Украинийн цэргийн тагнуулын байгууллагаас зөвхөн өнгөрсөн долоо хоногийн бямба, ням гарагт л гэхэд Умард Солонгосын гучин цэрэг амиа алдаж, шархадсан гэж мэдэгджээ. Умардын цэргүүд орос цэргүүдээс эрс ялгарсан дүрэмт хувцастай учир холын зайнаас ч харахад амархан танигдаж байгаа гэнэ. Мөн тэд аль хэдийн хоцрогдсон, Солонгосын хойгийн дайны үеийн буюу 70 жилийн өмнөх тактик ашиглаж буй учир явган цэргийн довтолгоо нь төдийлөн газар ахиж амжихгүй, амиа алдсан болон шархадсан цэргийн тоо хэдэн зуугаар яригдаж байгаа аж.

Умардын цэргүүд бодит байлдааны туршлага муу, мөн дээр нь үл мэдэх газар нутагт, орчин цагийн байлдааны үйл ажиллагааны ойлголт тааруу гэсэн дүгнэлтийг барууны цэргийн тагнуулынхан хийсэн байна. Буу барьснаас бусдаар цэргийн бүх шатандаа байлдааны ямар ч туршлагагүй учир фронтын шугамд хамгийн түрүүнд Умард Солонгосын цэргүүд галд өртөж, хохирол амсаж байна гэж АНУ-ын цэргийн байлдааны ажиллагаанд үнэлгээ хийх албаны мэргэжилтнүүд дүгнэжээ. Гэхдээ бас Ким Чен Ун өндөр хэмжээнд бэлтгэгдсэн элитийн шилдэг цэргүүдээ илгээсэн учир яаран дорд үзэх хэрэггүй гэдгийг ч анхааруулсан байна. Учир нь, Украинд байлдаж буй Пхеньяны цэргүүд нь 11-р армийн харьяа, Солонгосын дайны үед зэвсэгт хүчин удирдаж байсан, Дэслэгч Генерал Чун Ин Бумын хариуцдаг “Шуурган корпус” хэмээн алдаршсан цэргүүд аж. Тэдгээр цэргүүд нь биеийн хүчний бэлтгэл сайтайн дээр улс төрийн суртал ухуулгад гүн автсан, өгсөн тушаалыг биелүүлэхийн тулд амиа ч хайрлахгүй тулалдах сэтгэл зүйтэйг анхаарууштай гэв.

АНУ-ын Вашингтон дахь Стимсоны төвийн 38-р Умардын хөтөлбөрийн орон тооны бус ажилтан, аналист Майкль Маддений ярьж буйгаар Вьетнамын дайнаас хойш гадаадад хамгийн олон тоогоор байрлуулаад байгаа цэргүүд нь юунд ч үл автах сэтгэлзүйгээр зэвсэглэсэн. Ерөнхийд өө, тэднийг програмчилсан гэсэн үг.