Олон жилийн турш дэлгэцнээ баатарлаг цэргийн дүрд тоглож ирсэн Холливуудын алдарт жүжигчин Том Круйз бодит амьдрал дээр ч гэсэн цэргийн баатар болжээ. Сөнөөгч онгоцны нисгэгчдийн баатарлаг гавьяаны тухай өгүүлдэг Топ Ган киноны хоёр ч ангид тоглосон түүнийг киногоор дамжуулан АНУ-ын Тэнгисийн цэргийн үйл хэргийг олон нийтэд сурталчлан таниулж, зэвсэгт хүчний үйл ажиллагаанд ихээхэн хувь нэмэр оруулсан хэмээн үнэлж, Тэнгисийн цэргийн олноо ялгуусан зүтгэлтэн шагналыг өнөөдөр/2024.12.17/ Лондон хотод гардуулсан байна. Шагнал гардуулах ёслолын хэвлэлийн мэдээнээс үзэхэд Олноо ялгуусан зүтгэлтэн гэх шагнал нь Тэнгисийн цэргийн бус хүний хүртэж болох хамгийн дээд шагнал аж. Шагналыг Тэнгисийн цэргийн нарийн бичгийн дарга Карлос Дел Торо гардуулан өгөхдөө “Том Круйзийн уран бүтээл үе, үеийн залуусыг тэнгисийн болон явган цэрэгт элсэж, эх орныхоо төлөө хүчин зүтгэхэд хөтөлсөн билээ” хэмээн тодотгожээ. “Топ Ган” кино нь олон улсын зах зээлд хит болоод зогсохгүй залуусын дунд цэргийн алба хаах хүслийг нь бадрааж, жилээс жилд цэрэгт элсэгчдийн тоо нэмэгдэхэд эерэг үлгэр дуурайлал үзүүлсэн байна. Тиймээс Том Круйз бол цэргийн баатар хэмээн өргөмжлөгдөх эрхтэй хүн юм гэжээ. Дээрх кино нь 2020 онд Тэнгисийн цэргийн албанаас Тэнгисийн цэргийн хүндэт нисгэгч шагналыг хүртэж байжээ.