Австралийн Сидней хотын баруун хэсэгт орших Конкорд Вест сургуулийн сурагчдын 25%-иас олонх нь монгол хэлээр ярьдаг. Өнгөрсөн арваннайман сарын хугацаанд монгол хэлээр ярьдаг сурагчдын тоо огцом нэмэгджээ. Өмнөх оныхтой харьцуулахад бараг хоёр дахин нэмэгдсэн гэж тус сургуулийн захирал Моника Маршьелло ярьж байна. Монгол хэлээр ярьдаг сурагчдын тоо ийн өссөнтэй уялдуулан сургуулийн захиргаанаас хичээл, анги танхимд монгол хэлний хэрэглээг нэмэгдүүлж, Монголоос очсон болон тэнд төрсөн монгол хүүхдүүдэд англи хэл сурахад нь дэмжлэг үзүүлэхээс гадна эх хэлээ улам сайн сурах, уламжлалт ёс заншлаа танин мэдэх бололцоог хангаж өгсөн байна. Үүний тулд монгол хэлний багш гаргаж өгснөөс гадна ном, сурах бичиг, онлайн хэрэгсэл ашиглан сургалтын хөтөлбөр боловсруулсан гэнэ. Сурагч хүүхдүүдээс гадна эцэг эхчүүдэд чиглэсэн монгол хэлний сургалтыг монгол багш ордог болжээ. Шинэ улс, шинэ орчинд орж, шинэ хэл, соёлтой танилцахад олон хүндрэл тулгардаг. Тиймээс шинэ сурагчид өөртэй нь адилхан монгол хүн харахаараа санаа нь амарч тайвшраад илүү чөлөөтэй, нээлттэй болдог гэж Конкорд Вест сургуулийн монгол хэлний багш Намхайжамцангийн Ганчимэг ярилаа. Австрали дахь монголчууд болон тэдний хүүхдүүдийг уулзуулж, өв соёл, хэл, бичгээ сурахад зориулсан хөтөлбөр хэрэгжүүлэхийн тулд тус сургуулийг Австрали дахь монголчуудын төв болгон зохион байгуулснаар олон янзын арга хэмжээ зохиож эхлээд байна. Хамгийн сонирхолтой нь монгол хэлээс гадна монгол бичиг зааж, шагайн харвах зэрэг уламжлалт наадгайнуудыг хүүхдүүдэд зааж өгч байгаа аж.

Сүүлийн жилүүдэд Австралийг зорин очиж амьдрах монголчуудын тоо огцом өссөөр байгаа бөгөөд 2021 оны тооллогоор Монголд төрсөн 5000 гаруй хүн Австралид амьдарч байгаа бол монгол гаралтай гэх 7800 хүн байдаг юм байна. Харин 2024 оны байдлаар дээрх тоо хоёр дахин өсөж, 22,000 орчимд хүрсэн гэж Монгол улсаас Австрали улсад суугаа элчин сайд Дамдинсүрэнгийн Даваасүрэн онцолжээ. Өнөөдрийн байдлаар дээрх тооны монголчуудын 60% нь Нью Саут Вейлсэд төвлөрөн амьдардаг байна.