Украинийн дайнд ашигласан пуужингийн системийг шинэчлэх ажилд ахлах инженерийн үүрэг гүйцэтгэсэн Оросын шилдэг эрдэмтэн Михайль Шацкийг цэргийн тагнуулын албаныхан тусгай ажиллагаа явуулж, Москвагийн ойролцоох Кузминскийгийн цэцэрлэгт хүрээлэнд буудан хөнөөсөн гэж Украинийн Батлан хамгаалах яамны эх сурвалж мэдээлжээ. Пуужингийн системийн салбарт тэргүүлэгч эрдэмтнийг устгасан ажиллагааг хоёр хоногийн өмнө зохион байгуулсан аж.

М.Шацкий нь Москвад төвтэй Марс зохион бүтээх товчооны зохион бүтээгч, програм хангамжийн албаны даргаар ажиллаж байсан бөгөөд Х-59, Х-69 тээвэрлэгч пуужинг шинэчлэх ажлыг хариуцан ажилласан юм байна. Энэхүү Марс зохион бүтээх товчоо нь ОХУ-ын төрийн өмчид Росатом корпорацийн харьяа бөгөөд нисэх онгоц болон сансрын хөлгийн удирдлага, автомат хяналтын систем хөгжүүлэх, үйлдвэрлэх үүрэгтэй байгууллага юм.

Эх сурвалжийн дамжуулснаар М.Шацкий нь сүүлийн үед Оросын дрон, нисэх онгоц, сансрын хөлөгт ашиглах хиймэл оюунт технологи боловсруулах ажлыг гардан авч ажиллаж байсан гэнэ. Түүний үхлийн талаар Кремлийг хүчтэй эсэргүүцэгч сэтгүүлч Александер Невзоров Телеграм дахь Украинийн цэргийн тагнуулын хуудсаар дамжуулан “онц ноцтой гэмт хэрэгтэнг устгалаа” хэмээн мэдээлж, цасан дээр хэвтэх цогцосны зурагтай нийтэлж байжээ.