Сирийн босогчид нийслэл Дамаск хотыг авч Башар Аль Ассадын жаран жилийн ноёрхол нурсан. Харин энэ үеэр Туркийн талаас Сирийн умард нутагт цэргийн ажиллагаа явуулж, Ефрат мөрний чухал бэхлэлтийн нэг Манбиж хотыг курдуудын удирдсан Сирийн ардчилсан хүчний мэдлээс бүрэн чөлөөлсөн гэж мэдэгджээ. Харин эсрэг талынхан өнөөдөр ч хотын төлөөх тулаан үргэлжилж байгаа гэж мэдэгдсэн нь Туркийн Ерөнхийлөгч Режип Таип Эрдоганы дээрх мэдэгдэлд эргэлзэхэд хүргэж байна.

Гэхдээ өнөөдөр өрнөөж буй нөхцөл байдлаас гадна бас нэгэн сонирхолтой үйл явдал болсныг Английн Телеграф сонин дамжуулсан байна. Учир нь, өнгөрсөн долоо хоногийн ням гарагт Туркийн Ерөнхийлөгч Режип Таип Эрдоган Сирид өрнөж буй үйл явдлын талаар байр сууриа илэрхийлэхдээ “Сирид өрнөж буй явдал курдууд давамгайлж байгаа нь тус улсын ирээдүйд шууд нөлөөлөх нь гарцаагүй. Харин манай улсын зүгээс үүний эсрэг байр суурьтай байна. Өнөөдөр дэлхий дээр хоёрхон жинхэнэ удирдагч үлдлээ. Нэг нь би, нөгөөх нь Владимир Путин.” Хэмээн ярьжээ. Товчхондоо Бүгд Найрамдах Турк Улс нь Сирийн асуудал дээр ОХУ-ын талыг баримталж буйгаа илэрхийлснээс гадна ардчиллыг дэмжин гарч ирж, дарангуйллыг унагасан шинийг эрэхлхийлэгчдийг эрс үгүйсгэсэн хариуцлагагүй мэдэгдэл байлаа гэж барууны томоохон хэвлэлүүдээр шүүмжилжээ.

Харин олон улсын ажиглагчдын үзэж буйгаар Турк улсын Төрийн тэргүүн иймэрхүү байр суурь илэрхийлсэн нь тус улсын хувьд олон жилийн турш хөөцөлдөж ирсэн Европын холбоонд нэгдэж, Европын улс болох мөрөөдөл нь замхрах аюулыг даллаж ч магадгүй аж.