Ардчилсан намаас гарсан АНУ-ын Нью Жерси мужийн захирагч Фил Мёрфи өнгөрсөн даваа гарагт нийтийн болон сургуулийн номын санд ашиглаж буй аливаа төрлийн номонд хориг тавихыг хориглосон хууль баталж, олон жилийн турш гомдол тээж явсан номын санчдын сэтгэлийг амраажээ. Ингэснээр өмнөх Боловсролын тухай хуульд заасан номын санд ашиглахыг хориглох номын жагсаалтыг хүчингүй болгож, номын санч нар үүнээс улбаалан шүүхэд дуудагдаж, эрүүгийн хэрэгт татагддаг байсан бусармаг үе тус мужийн хэмжээнд өнгөрлөө гэж Ройтерс мэдээлсэн байна. Нөгөөтэйгүүр, дээрх шийдвэрийн үр дүнд Нью Жерси нь ном хориглох тал дээр ардчилсан чиг баримжаатай болсон ээлжит мужаар нэрлэгдэж байгаа юм. Тус мужийн өмнө Иллинойз, Миннессота мужид номын санд ашиглах номонд хориг тавихыг хориглосон хууль баталсан юм. Бас нэг талаасаа Бүгд найрамдахчуудын анх санаачлан боловсруулсан номонд хориг тавих тухай асуудал нь өнөөдрийг хүртэл хэчнээн бурангуй шийдвэр байсныг ийнхүү залрууллаа гэж захирагч Фил Мёрфи онцлон хэлжээ. Өмнөх хуульд аливаа номын гарал үүсвэр, эх сурвалж, намтар, түүнд орших агуулгын харах өнцөг, зохиолчийн хандлагад тулгуурлан олон нийтэд хүргэхэд зохисгүй ном хэмээн үзэж, нийтийн болон сургуулийн номын санд ашиглахыг хориглодог хатуу цензуртэй байсан юм.