Ахархан настай дайны онц байдал зарлаж, улс орноо зургаан цагийн турш бужигнуулж орхисон Юн Сүк Ёлийн хэрэг өндрийг авсаар. БНСУ-ын Хууль зүйн яамнаас өчигдөр Ерөнхийлөгчдөө хилийн хориг тавьчихлаа. Энэ нь аливаа улс орны хууль хэрэгжүүлэгч байгууллагаас төрийн тэргүүндээ хилийн хориг тавьсан маш ховор тохиолдол гэдгийг онцлох хэрэгтэй. Цагдаагийн байгууллагаас хамаарал бүхий хүчин зүйлсэд нарийвчилсан үнэлгээ хийх шаардлагатай гэж үзсэний үндсэнд Өмнөд Солонгосын Дээгүүр албан тушаалтнуудыг шалгах Авлигатай тэмцэх хэлтсээс гаргасан хүсэлтээр холбогдох яам тийнхүү шийдвэрлжээ.

БНСУ-ын Үндэсний Цагдаагийн Ерөнхий Газрын мэдээлснээр Юн Сүк Ёлийг олон нийтийг үймээн самуун, зэвсэгт бослогод турхирсан, эрх мэдлээ буруугаар ашигласан зэрэг үндэслэлээр тус улсын цагдаа болон прокурорын байгууллагаас явуулсан шалгалтын үр дүнд яллагдчаар татах санал дээд газартаа хүргүүлсэн гэж байна. Энэ ч утгаараа хууль ёсны шаардлагад нийцсэн тохиолдолд Юн Сүк Ёлийг зөвшөөрөлгүйгээр баривчлах боломжтойг нэмж хэллээ.

Өмнөд Солонгосын хуулиар зөвшөөрөлгүй баривчилгааг онц ноцтой гэмт хэрэгтэнүүдэд явуулдаг. Ерөнхийдөө, хилийн чанад руу оргон зайлах эрсдэлтэй, хэргийн нотлох баримт устгаж болзошгүй сэжигтэнд хилийн хориг тавьж, шүүхийн зөвшөөрөлгүйгээр яаралтай баривчилгаа явуулж болно. Өөрөөр хэлбэл, сэжигтэн Юн Сүк Ёльд хилийн хориг тавьсан нь шүүхийн зөвшөөрөлгүйгээр яаралтай баривчилж буйгаас өөрцгүй гэсэн үг юм.

Хуулийнхан дайны онц байдал зарласан хэргийг эх орноосоо урвасантай адилтган үзэж байна. Тэгэхээр дээр дурдсанчлан Юн Сүк Ёль дээр яаралтай баривчилгаа явуулахаар шийдвэрлэсэн нь түүнийг цаазаар авахуулах эсвэл бүх насаараа хоригдох ялтай гэмт хэрэгт яллагдчаар татсанаас ялгаагүй гэж ойлгож болох нь.

БНСУ-ын Үндэсний Цагдаагийн Ерөнхий Газар өнгөрсөн ням гарагт 150 мөрдөн байцаагч, эрүүгийн тагнуулаар туршлагажсан 30 мэргэжилтэн бүхий баг байгуулан, Юн Сүк Ёлийн хэргийг шалгаж эхэлсэн гэж мэдээлсэн. Ингэхдээ уг баг нь хэрэгт хамаарал бүхий байж болзошгүй хувь хүн, эх сурвалжуудыг ямар нэгэн хуулийн хязгаарлалтгүйгээр шалгах бүрэн эрхтэй гэжээ. Мөн дээр нь БНСУ-ын Үндэсний мөрдөн шалгах албаныхан хүч нэмэгдүүлж, эрх орноосоо урвасан хэрэг үүсгэж, бүрэн хүчин чадлаа дайчлан ажиллахаар болсон гээд тус улсын хууль, цагдаагийнхан бүгдээрээ хөдөлж байгаа нь эцсийн дүндээ хуулийн дээд хэмжээ өгөх эсэх тухай яригдах нь гарцаагүй болж байх шиг байна.