Сирийн босогчид өчигдөр тус улсын нийслэл Дамаск хотод нэвтэрснээр нөхцөл байдал улам хурцадмал болжээ. Иймд цөхрөнгөө барсан Сирийн Ерөнхийлөгч Башар Аль Ассад хамгийн дотнын нөхөр, гол холбоотон ОХУ-ын Ерөнхийлөгч Владимир Путинаас орогнол хүссэнийг Кремль хүмүүнлэгийн үндэслэлээр таалан болгоосноор тэрбээр гэр бүлийн хамтаар Москвад дүрвэн очсон. Б.Ассад Москвад ирж, Кремль Сирийн сөрөг хүчнийхэнтэй тус улс дахь Оросын цэргийн баазуудын аюулгүй байдлыг хамгаалах тохиролцоонд хүрсэн гэж ТАСС тэргүүтэй орон нутгийн мэдээллийн агентлагууд уламжилсан байна.

ОХУ-ын Гадаад хэргийн яамнаас гаргасан мэдээллээр босогчид Дамаск хотод нэвтэрсний дараа Б.Ассад нь улс төрийн эрх мэдэл шилжүүлэх ажлыг тайван замаар өрнүүлэх зарлиг буулгаад тус бүс нутгийг орхин гарсан гэж мэдээлжээ. Ингэснээр Б.Ассадын гэр бүлийн Сирид тогтоосон 60-аад жилийн ноёрхол төгсгөл боллоо хэмээн ВВС агентлаг онцолсон байна.

Зарим эх сурвалжийн дамжуулснаар ОХУ-ын талаас Сирид үүссэн улс төрийн хямралыг шийдвэрлэх ажилд оролцохоор болсон бөгөөд нэн тэргүүнд тэнд байгаа цэргийн баазуудаа бүрэн бүтэн авч үлдэх зорилго тавьж буй гэлээ.